Жагсаалын үеэр 80 гаруй хятад цагдаа нар 30 машин хөлөглөн ирж жагсагчдыг харгисаар бороохойдож, 22 өвөрмонголыг баривчилсан юм.

    Энэ хэрэгтэй холбогдуулан өвөрмонголчууд өнгөрсөн долоо хоногийн мягмар гаригт дахин жагссан байна. Өвөрмонголын зүүн хэсэгт байрлах Найман аймгийн Түлээ Гацаа нутгийн 40 гаруй фермер болон тосгоны иргэд жагсаалын үеэр баривчлагдсан 22 өвөрмонголыг суллахыг шаардан дахин жагсчээ.  
   
    Тэд 22 өвөрмонголыг суллахыг шаардсанаас гадна, тэднээс булаан авсан 10 мянган акр газрыг буцаан өгөхийг шаардсан байна.

    Жагсагчид өвөрмонгол болон хятадаар “Баривчилгаа хууль бус, Баривчлагсдыг сулла, Бидний газар нутгийг буцаан өг” гэсэн бичигтэй лоозон барьжээ.

    Хятадын Коммунист намын нарийн бичгийн даргын төлөөлөгч Ли Юшан үймээнийг авч үзээд орон нутгийн удирдлагыг зөвтгөж, өвөрмонголчуудыг буруутгажээ.

    “Хэрвээ монгол фермерүүд бидэнтэй тохиролцвол бид асуудлыг шийдэж болох юм. Гэвч монголчууд тохиролцохыг хүсээгүй” хэмээн хэлсэн байна.

    Хятадын цагдаагийн байгууллага өнгөрсөн лхагва гаригт дахин жагсагчдын төлөөлөл болгон таван өвөрмонгол фермертэй уулзжээ. Тэд “Хэрвээ та нар газар нутгийн тэмцлээ зогсоохоо амлаж гарын үсэг зураад, гэртээ чимээгүйхэн харивал баривчлагсдыг суллана” гэж даапаалсан хэмээн Өвөрмонголын хүний эрхийн мэдээллийн төв бичжээ.

    Харин өвөрмонгол жагсагчид цагдаа нарын саналаас татгалзаж “Бид хятадын засгийн газар баривчлагдсан 22 өвөрмонгол иргэнийг суллатал, жагсагчдыг зодсон цагдаа нарт хариуцлага тооцтол, бидний хохирлыг барагдуултал, бидний газар нутгийг буцаан өгтөл жагсаалаа зогсоохгүй” хэмээн мэдэгдсэн байна.

    “Хятадын төрийн өмчит “Шин Лон Гао” ойн аж үйлдвэрийн компани хэдэн жилийн өмнөөс өвөрмонголчуудын газар нутгийг авахыг санаархсан, гэвч одоо авчихаад байна” хэмээн Өвөрмонголын хүний эрхийн мэдээллийн төв бичжээ.