“I love Mongolia” өнгөрсөн удаад Дорноговь аймгаас мэдээ мэдээллийг сурвалжлан хүргэж байсан. Тухайн үед аймгийн бүтээн байгуулалт, сургууль, цэцэрлэг, эмнэлгийн үйл ажиллагаа зэрэг олон арга хэмжээг олон нийтэд мэдээлсэн бол энэ удаад засаг дарга П.Ганхуяг юуг онцолсоныг дурдах нь зүйтэй биз ээ.

Дорноговь аймгийн Засаг дарга П.Ганхуягийн хэлж буйгаар “Манай аймгийн хэмжээнд эмнэлэгийн үйл ажиллагаа, боловсрол, дэд бүтэц дээрээ түлхүү анхаарч байгаа. Харин хөрөнгө оруулалтын хувьд  Дорноговь аймагт 40 гаруй тэрбум төгрөгийн хөрөнгө оруулалт хийгдсэн. Ялангуяа нийгмийн салбарт төлөвлөгдсөн сургууль, цэцэрлэгүүд бүгд ашиглалтад орсон. Дээрээс нь Дорноговь аймгийн хүн амын төвлөрөл багатай сумдад шинээр цэцэрлэг, дотуур байртай болсон. Орон нутагт сүүлийн хоёр жилд санхүүгийн эрх мэдэл шилжсэнээр багагүй бүтээн байгуулалтын ажил хийлээ.

Цаашдаа иргэдэд зайлшгүй хэрэгтэй салбарт хөрөнгө оруулалтуудыг бүрэн татаж өгөх болно. Энэ асуудалд иргэдийн сэтгэл их өндөр байгаа. Ялангуяа мал аж ахуйн салбарт өнгөрсөн оны сүүлчээр нэг сая 686 мянган тоо толгой мал тоолуулсан. Энэ тоо таван жилийн өмнө 900 мянга байсан юм. Энэ нь Дорноговийн малчид ихээхэн идэвхтэй ажиллаж байгаа, түүнчлэн малчдыг дэмжсэн төрийн бодлого хэрэгжиж эхэлж байгаагийн илрэл юм.

Бас нэг том бүтээн байгуулалт гэвэл бид нийслэл хоттойгоо засмал замаар холбогдож чадлаа. Мөн Замын-Үүдээс Эрээн хүртэлх 230 километр замыг ашиглалтад оруулсан. Энэ ажилд салбарын яамдууд болон орон нутгийн байгууллагаас их дэмжлэг үзүүлсэн. Аялал жуулчлалыг Хамрын хийд рүү чиглүүлэх ажил эрчимтэй өрнөж байна. Ингэхдээ Хамрын хийдийг 2030 он хүртэл цогц бодлогоор хөгжүүлэх, аялал жуулчлалын тав тухтай орчин бүрдүүлэх тал дээр хөтөлбөр боловсруулж байна. Аялал жуулчлалаас олох  орлогын хувьд жил бүр хамрын хийдийг үзэхээр  70-80 мянган хүн ирдэг байсан бол энэ жил 110 мянга гаруй хүн ирлээ. Мөн аймгийн нэг өв болох үлэг гүрвэлийн томоохон хүрээлэн, музей бүхий цогцолбор байгуулахаар зорьж байна. Харин шилжилт хөдөлгөөний хувьд сумаас аймаг хүртэлх хөдөлгөөн нэлээд байх шиг байна. Харин аймгаас хотыг зорих хөдөлгөөн бараг зогссон гэж хэлж болно” гэлээ.

Д.Ундрах