Үндсэн хуулийн суурь үзэл баримтлалыг алдагдуулан, Ерөнхий сайдын бүрэн эрхийг хязгаарласан болохыг өнөөдөр хуралдсан Үндсэн хуулийн цэцийн их суудлын хуралдаанаар эцэслэн тогтоов.

УИХ-ын тухай хуулийн 7 дугаар зүйлийн 7.1.12 дахь заалтаар Засгийн газрын гишүүнийг огцруулах асуудлыг Ерөнхий сайдын оролцоогүй буюу түүний саналгүйгээр УИХ-ын нэг гишүүний саналыг үндэслэн УИХ шууд хэлэлцэн шийдвэрлэх боломжийг бүрдүүлсэн байгаа нь эрх мэдэл хуваарилах болон танхимын зарчмын талаарх Үндсэн хуулийн суурь үзэл баримтлалыг алдагдуулан, Ерөнхий сайдын бүрэн эрхийг хязгаарласан гэж дээрх хуралдаанаас шийдвэрлэлээ.

Мөн хуулийн дээрх зохицуулалт нь “Монгол Улсын Ерөнхий сайд Засгийн газрын бүтэц, бүрэлдэхүүн, түүнд өөрчлөлт оруулах саналаа Ерөнхийлөгчтэй зөвшилцөн УИХ-д өргөн мэдүүлнэ”., “Ерөнхий сайд Засгийн газрыг удирдаж, төрийн хууль биелүүлэх ажлыг УИХ-ын өмнө хариуцна”. гэсэн Үндсэн хуулийн заалтыг тус тус зөрчсөн гэсэн Үндсэн хуулийн цэцийн Дунд суудлын хуралдаанаас өмнө нь гаргасан дүгнэлтийг үндэслэлтэй гэж үзлээ.

Иймд УИХ-ын тухай хуулийн 7 дугаар зүйлийн 7.1.12 дахь заалтын “УИХ-аас сонгогдсон буюу томилогдсон албан тушаалтны илтгэл, сонсгол хэлэлцүүлэх, тэдгээрийг эгүүлэн татах, огцруулах санал гаргах. ...” гэсний “... томилогдсон ... огцруулах ...” гэсэн хэсгийг болон Монгол Улсын Их Хурлын Үндсэн хуулийн цэцийн 2015 оны 11 дүгээр дүгнэлтийг хүлээн зөвшөөрөх боломжгүй гэсэн 2015 оны 10 дугаар сарын 8-ны өдрийн 83 дугаар тогтоолыг хүчингүй болгов.

Т.Энхэлээ