Увс аймаг дахь МВС телевизийн сүлжээг энэ сарын 3-нд хаажээ. Телевизийн хамт олон үүнийг “Хэвлэлийн эрх чөлөөнд халдсан үйлдэл боллоо” хэмээн мэдэгдэж байна.

Бүр тодруулбал, Увс аймагт УИХ- ын дарга З.Энхболд нарын хүмүүс ирэхтэй холбогдуулан МВС телевизийн сүлжээг "Мэдээлэл холбооны сүлжээ" компаниас тасалжээ.

Учир нь тэд эфирээ Мэдээлэл холбооны сүлжээ компанийн шилэн кабелийг түрээслэж дамжуулдаг юм байна.

Уг нь сүлжээ хаах эрх хоёр газарт байдаг байна. Өөрөөр хэлбэл, Үндэсний аюулгүй байдлын зөвлөл, Харилцаа холбооны зохицуулах хорооноос сүлжээ таслах эрхтэй аж.  Ингэхдээ заавал урьдчилан мэдэгдэх ёстой. Гэтэл МВС телевизийнхэнд  мэдэгдэхгүйгээр сүлжээг тасалсан асуудал гарчээ.

Телевизийн үйл ажиллагаа одоо хүртэл зогссон байдалтай байна. Тэд цахилгаан холбооны сүлжээгээр дамжуулж эфирээ цацахаар холболт хийж байгаа сурагтай.

МВС телевизийн хувьд "Гудамж” төсөлтэй холбоотой үйл ажиллагааг шүүмжилсэн мэдээлэл бэлтгэсэн юм байна. Улмаар АН-ын удирдлагууд Увс аймаг энэхүү төслийн нээлтэд ирсэн учир буюу төслийн асуудлыг сөхөхөөс сэргийлж тус телевизийн сүлжээг тасалсан гэж хардаж байгаа аж. Увс аймагт Гудамж төслийн хүрээнд явагдаж байгаа ажлууд маш эргэлзээтэй байгааг телевизийнхний зүгээс онцолж байна.

Д.Дуулим