Үндсэн хуулийн цэцийн гишүүн асан Д.Сугарын хүү С.Цог Өршөөлийн хуульд хамрагдаж, өнгөрөгч нэгдүгээр сарын сүүлээр хорих ангиас суллагдсан тухай эх сурвалж мэдээллээ.

С.Цог нарын 12 хүнд холбогдох хэргийг Дүүргийн нэгдүгээр прокурорын газарт хянаж, Эрүүгийн хуулийн тусгай ангийн 192 дугаар зүйлийн 192.3.4-т зааснаар яллах дүгнэлт үйлдэн, 12 жилийн ял төлөвлөн ирүүлсэн байдаг. Дээрх зүйл заалт нь Өршөөлийн хуульд хамрагдах боломжгүй заалт бөгөөд 2015 оны гуравдугаар сарын 2-ны анхан шатны шүүх хурлаар уг хэргийг хэлэлцэж, шүүгч Ү.Түмэнжаргал, шүүгдэгч С.Цогийн холбогдох хэргийн зүйл заалтыг өөрчилж, Эрүүгийн хуулийн тусгай ангийн 192 дугаар зүйлийн 192.1 болгосон байна.

2014 оны дөрөвдүгээр сарын 9-ний өдрийн хоёр дахь шатны шүүх хуралдаанаар С.Цог нь 2013 оны зургадугаар сарын 12-ны өдөр НҮБ-ын “Сэтгэцэд нөлөөт бодис”-ын тухай конвенцийн жагсаалтад багтсан метамфетамин гидрохлорид агуулсан “мөс” гэх бодисыг борлуулах зорилгоор хууль бусаар олж авсан, хадгалсан, борлуулсан гэмт хэргийг давтан үйлдсэн гэмт буруутайд тооцож, хоёр жилийн хорих ял оноож, таслан сэргийлэх ажиллагааг зогсоон хорих ялд шилжүүлэх шийдвэр гаргасан. Улмаар хорих ялыг 2015 оны гуравдугаар сарын 2-ны өдрөөс тооцож эхэлсэн байна. Харин С.Цог нь 2015 оны гуравдугаар сараас хойш хорих ял эдэлж байгаад, энэ оны нэгдүгээр сард Өршөөлийн хуульд хамрагдан суллагдаад байгаа юм.

Д.Дуулим