Колумбын баруун хэсэгт энэ сарын 10-ны өглөө хүчтэй газар хөдөлж, олон хот сууринд барилга байгууламж нурж, хүний амь нас эрсэдсэн томоохон гамшиг нүүрлэлээ. Орон нутгийн цагаар өглөөний 07:34 цагийн орчимд болсон газар хөдлөлтийн магнитудыг АНУ-ын Геологийн алба 7.4 гэж тогтоосон байна. Газар хөдлөлтийн голомт нь Колумбын Чоко мужийн Сан Хосе-дель-Пальмар хотын орчимд, газрын гүнд ойролцоогоор 100 гаруй километрийн гүнд байрлажээ.

Газар хөдлөлтийн чичирхийлэл Колумбын олон бүс нутагт хүчтэй мэдрэгдэж, нийслэл Боготагаас гадна Кали, Перейра, Манисалес, Кибдо зэрэг хотод барилга байгууламжид ноцтой гэмтэл учирсан байна. Мөн хөрш Эквадор, Панамын зарим хэсэгт ч чичирхийлэл мэдрэгджээ. Хохирогчдын тоо цаг тутам нэмэгдэж байгаа бөгөөд наймдугаар сарын 10-ны оройн байдлаар 100 гаруй хүн амиа алдсан, 80 гаруй хүн гэмтсэн талаар мэдээлжээ. Перейра хот болон Рисаральда муж хамгийн их хохирол амссан бүсүүдийн нэг болсон байна. Зарим мэдээллээр зөвхөн Перейра хотод олон арван хүн амиа алдсан бөгөөд нуранги дор хүмүүс дарагдсан байж болзошгүй тул аврах ажиллагаа үргэлжилж байна.

Кали хотод хэд хэдэн барилга нурж, хүмүүс нуранги дор гацсан тухай мэдээлэл гарсан байна. Аврах багийнхан хүнд машин механизм ашиглан нурангийг цэвэрлэж, амьд үлдсэн хүмүүсийг эрэн хайж эхэлжээ. Зарим хотын нисэх онгоцны буудлыг барилга байгууламжийн аюулгүй байдлыг шалгах зорилгоор түр хаасан байна.

Газар хөдлөлт эхлэх үед Колумбын шинэ ерөнхийлөгч Абелардо де ла Эсприэлла албан тушаалаа хүлээн аваад ердөө гурав хонож байсан бөгөөд гамшгийн хариу арга хэмжээг удирдан зохион байгуулах ажилдаа яаравчлан оржээ. Засгийн газар үндэсний хэмжээний гамшгийн нөхцөл байдал зарлаж, аврах, тусламжийн ажиллагааг эрчимжүүлсэн байна.

Газар хөдлөлтийн улмаас зам, барилга байгууламж болон нийтийн үйлчилгээний сүлжээнд гэмтэл гарсан бөгөөд аврах ажиллагаанд орон нутгийн байгууллагуудаас гадна төв засгийн газрын хүч нэмэгдэн оролцож байна. Мөн АНУ, Бразил, Эквадор, Мексик зэрэг улс Колумбид хүмүүнлэгийн тусламж үзүүлэхэд бэлэн байгаагаа илэрхийлжээ.

Колумб нь тектоникийн хэд хэдэн хавтангийн заагт оршдог учир газар хөдлөлтийн идэвх өндөртэй улс юм. Энэ удаагийн газар хөдлөлт нь тус улсын сүүлийн жилүүдийн хамгийн хүчтэй чичирхийллүүдийн нэг болж, баруун болон төвийн бүс нутгуудад их хэмжээний хохирол учруулжээ.

Л.Баяр