Монгол Улсын Засгийн газрын шийдвэрээр “Оюутан цэрэг” цэргийн мэргэжил олгох сургалтыг 2014 оноос хойш 12 дахь жилдээ, Дархан-Уул аймагт 3 дахь жилдээ амжилттай зохион байгууллаа.

Зэвсэгт хүчний 330 дугаар ангийн сургалтын материаллаг баазыг түшиглэн явагдсан тус хөтөлбөрт Дархан-Уул, Улаанбаатар хот, Архангай, Сэлэнгэ аймгаас нийт 125 оюутан залуус хамрагдан, амжилттай суралцаж өнөөдөр /2026.08.10/ тангарагаа өргөлөө.

Залуус 2026.04.30-наас 2026.05.30-ны өдөр хүртэл цэргийн ерөнхий бэлтгэлд, 2026.06.10-наас 2026.08.10-ныг хүртэл цэргийн мэргэжлийн бэлтгэлээр цэргийн 10 мэргэжлээр суралцан төгсөж байна.

Оюутан цэргийн тангараг өргөх ёслолд Батлан хамгаалах яамны дэд сайд Д.Баасандамба, Дархан-Уул аймгийн Засаг дарга Б.Азжаргал болон албаны бусад хүмүүс мөн оюутан цэргүүдийн гэр бүл, найз нөхөд, ойр дотны хүмүүс оролцлоо.