УИХ-ын гишүүн Ж.Батзандан Баянгол дүүргийн 11, 12, 13 дугаар хорооны цэцэрлэг, сургуулийн багш, ажилчид, эцэг эхчүүдийг өнөөдөр хүлээн авч уулзан тулгамдаж буй асуудлыг нь сонслоо.
Баянзүрх дүүргийн Боловсролын хэлтсийн дарга Н.Цогзолмаа дээрх хороодод тулгамдаад буй асуудлуудыг танилцууллаа.
Тэрээр 126 дугаар сургуулийн ажил долоон жил царцанги байдалтай байна. Яам болон бүх шатны холбогдох хүмүүс арга хэмжээ авч ажиллаж байна. Сургуулийн ажил одоогоор эхлээгүй байна. Ажлыг эхлүүлж, сургуулийг өргөтгөчихвөл "Амгалан" цогцолбор сургууль, Баянзүрх цогцолбор сургуулийн хүүхдүүдийн ачаалал буурахаар байгаа юм. Мөн хүүхдүүд гэрийнхээ ойролцоо суралцах боломж гарч ирнэ.
Мөн 88 дугаар сургуульд спорт заал байдаггүй. Үүнээс болж хүүхдүүд биеийн тамирын хичээлд хамрагдах боломж хомс байдаг. Сүүлийн арван жил ийм байдалтай явж байна. Одоо спорт заалны тендер Боловсролын яам дээр зарлагдах гэж байгаа.
Мөн 40 дүгээр цэцэрлэгийн асуудал байна. Энэ цэцэрлэгт Эрүүл мэндийн яам, Боловсролын яамдад хаягдсан байдалтай, асуудал шийдэгдэхгүй олон жил явлаа. Саяхан сайдын баталсан удирдамжийн дагуу дүүргийн яамны төлөөлөл, Нийслэлийн Боловсролын газрын төлөөлөл улсын болно хувийн хэвшлийн сургууль, цэцэрлэгүүдэд үнэлгээ хийсэн. Үнэлгээ хийгээд явж байхад хамгийн их анхаарал татсан асуудал бол энэ цэцэрлэг байсан. Уг цэцэрлэгийн дээвэрт нуралт үүссэн, шал нь эмтэрч, мөн нуралт үүссэн байдалтай байна. Тус цэцэрлэгийн удирдлагууд өөрсдийн багахан хөрөнгөөр засвар хийгээд энэ шинэ хичээлийн жилээр хүүхдүүдээ авахаар төлөвлөсөн байдалтай байна. Хүүхдүүд ийм байдалтай байгааг боловсролын яманд мэдэгдэж өгөхийг танаас хүсч байна" гэлээ.
УИХ-ын гишүүн Ж.Батзандан "Үндсэндээ ойлголт авлаа. Зарим сургуулиудад нь хөрөнгө оруулалтыг тавьж өгчихөөд байхад тендерээ зарлаж ажлаа хийхгүй байна. Тухайлбал, 88 дугаар сургууль 800 сая төгрөг, 53 дугаар сургуульд Японоос буцалтгүй тусламжаар хөрөнгө оруулалт авсан, 44 дүгээр сургуульд бас л хөрөнгө оруулалтыг гаргаж өгсөн. Одоо хүртэл ажил эхлээгүй, тендер зарлагдаагүй байна. Бичиг цаастай ноцолдсоор байтал наадам чинь өнгөрөөд намар чинь болчихлоо. Дутуу баригдсан сургууль, цэцэрлэгийн ажилд анхаарлаа хандуулж, ажлынхаа хурдыг яаравчилмаар байна гэж яамны даргаас шаардана" гэлээ.
Мөн тэрбээр, улсын цэцэрлэгт хамрагдаж чадахгүй байгаа хүүхдүүдийг хувийн цэцэрлэгт сургаж, улсаас хувьсах зардлыг нь шилжүүлэх замаар цогцуулна. Ер нь Баянзүрх дүүрэгт улсын цэцэрлэг ховор, улсын хэмжээнд цэцэрлэгийн хамралт 70 хувьд дөхөж байна. Үлдэж байгаа 30 хувиа хувийн цэцэрлэг, хэвшилтэй хамтарч улсын төсвөөс хувьсах зардал буюу 100 гаруй мянган төгрөгийн шилжүүлэх маягаар шийдэж байгаа. Цэцэрлэгүүд дээрээ нэмж гэр цэцэрлэг барьж байгаа. Харьцангуй сайжирч байна. Миний хариуцаж авсан хороодоос 11 дүгээр хороо бол 96 хувийн хамрагдалтай болчихсон явж байна. 12 дугээр хороонд энэ жил бид шинэ сургууль барьж байна. Мөн шинэ эмнэлэг ашиглалтад оруулах гэж байна. 16 дугээр хороонд 2015 онд 21 дүгээр цэцэрлэгийг ашиглалтад оруулсан. Мөн ганц хоёр цэцэрлэг өргөтгөх шаардлагатай байгаа. Олон улсын байгууллагатай яриад өргөтгөх мөнгө санхүүжилт авсан. Одоо ажлыг нь шуурхайлах шаардлагатай байна" хэмээн ярилаа.
Р.Хишигжаргал