Глоб Интенэшнл ТББ болон Монголын Хуульчдын холбоо, Монголын Сэтгүүлчдийн зөвлөл нар өнөөдөр хэвлэлийн бага хурал хийлээ. Хэвлэлийн эрх чөлөөний тухай хууль батлагдсаны 20 жилийн ойг тохиолдуулан Глоб Интернэшнл төвөөс сэтгүүлчдийн аюулгүй байдалд мониторинг хийхээр болжээ. “Хүний эрх, хөдөлмөрлөх эрхийг хөхиүлэн дэмжих нь” төслийн хүрээнд тус төвөөс дээрх байгууллагуудтай хамтран мониторинг хийх юм.

Уг ажил нь хэвлэл мэдээлэл, сэтгүүлчдийн эсрэг үйлдэгдэж буй дарамт шахалт, заналхийлэл, хүчирхийлэлд олон нийт, төрийн анхаарлыг хандуулах зорилготой байна.

Өнгөрсөн оны тавдугаар сараас хойшхи жилийн нийт хугацаанд 140 хэвлэл мэдээллийн хэрэгсэлд хамаарах 182 удаагийн сэтгүүлчийн мэргэжлийн эрхэд халдсан тохиолдол гарсан нь сэтгүүлчдийн аюулгүй байдалд мониторинг хийх болсон гол шалтгаан хэмээн тэд тайлбарлаж байна. Мөн Хэвлэлийн эрх чөлөөний тайлан 2005 оноос бэлтгэж эхэлснээс хойш сэтгүүлчдийн эрхэд халдсан 701 тохиолдол бүртгэгджээ. Энэ нь сэтгүүлчдийн аюулгүй байдал алдагдсаар байгаагийн илрэл хэмээн Глоб Интернэшнл төвийн тэргүүн Х.Наранжаргал ярьсан юм.

Мөн тэрбээр “Хэвлэлийн эрх чөлөө гэдэг өөрөө иргэний эрх байдаг. Иргэн та төрийн үйл хэрэгт шууд оролуох эрхтэй. Харин үүний тулд чөлөөт, хараат бус, олон ургальч хэвлэл мэдээлэл хэрэгтэй юм. Танд үйлчлэхийн тулд сэтгүүлчид аюулгүй, хамгаалагдсан орчинд байх ёстой. Иймээс бид сэтгүүлчдийн аюулгүй байдлыг харуулсан мониторинг хийх гэж байна. Энэ хүрээнд Монголын Хуульчдын холбоотой хийсэн санамж бичгийн дагуу бид хэвлэл мэдээллийн хэрэгслээр мэргэшсэн мэргэжлийн хуульчдын тоог нэмэгдүүлэх сургалтыг зохион байгуулахаар болоод байна.” гэв.

“Хуульчдад сургалт явуулснаар хэвлэн нийтлэх эрх, эрх чөлөөг зөв таниулахад тустай. Түүнчлэн Олон Улсад даган мөрдөгддөг гэрээ, конвенцид баталгаажсан тухайн агуулгыг Монголын Хуульчдад таниулснаар хэвлэл мэдээллийн эрх чөлөө болон иргэдийн мэдэх эрхийг хамгаалах, хангах ажил жигдэрнэ” хэмээн Монголын Хуульчдын холбооны ерөнхийлөгч Ж.Хунан онцоллоо. Бид хэвлэл мэдээллийн эрх зүйгээр мэргэшсэн хуульчдыг бэлтгээд эхэлсэн. Цаашид 13 хуульч энэ чиглэлээр дагнах, сэтгүүлчидтэй ажиллах, зөвлөгөө өгөх, хамгаалах юм. Одоогийн байгаа эрх зүйн зохицуулалт, нөхцөл байдалд мониторинг хийж, цаашдын чиглэлээ тодорхойлно  хэмээн ярив.

Сүүлийн жилүүдэд сэтгүүлч, зураглаачдын биед халдах хэрэг их гарч байгаа. Энэ нь нэг талаараа сэтгүүлчдийн асуудал боловч нөгөөтэйгүүр иргэдийн мэдэх эрхэд халдаж байгаа хэрэг гэдгийг Глоб Интернэшнл төвийн Хэвлэл мэдээллийн хөтөлбөрийн менежер Ц.Мөнхжин хурлын үеэр үүнтэй холбоотой мэдээллүүдийг танилцуулсан юм. Сүүлийн арван жилд сэтгүүлчдэд дарамт шахалт үзүүлэх, биед нь халдах тохиолдол тогтмол өсч байгаа аж.

Б.Лхам