“Монполимет” Группын Төв аймгийн Заамар, Булган аймгийн Бүрэгхангай сумдын нутгийн зааг, Туул голын адагт орших Тосон үйлдвэрийн олборлолт, нөхөн сэргээлтийн үйл ажиллагаатай холбоотой илт гүтгэн гуйвуулсан мэдээлэл цацагдсантай холбоотой Монполимет компанийн удирдлагын зүгээс МЭДЭГДЭЛ гаргаж байна.

1999 онд Тосонгийн гольдролын 321А тоот тусгай зөвшөөрлийг Канад улсын 100 хувийн хөрөнгө оруулалттай Заамар Гоулд Фийлдс ХХК эзэмшиж байсныг үндэсний үйлдвэрлэгч “Монполимет” ХХК шилжүүлэн авч гадаад улсын мэдэлд байсан баялгаа монголчууд өөрсдөө авснаар одоо Тосон үйлдвэрээс гарах ашиг орлого Монгол хүн та бидний цалин хөлс, тэтгэвэр тэтгэмж, цэцэрлэг сургууль, эмнэлэгийн төсвийг бүрдүүлэхэд зарцуулагдаж байгаа.

Тухайн үеийн хууль журмын дагуу Япон улсаас зээл авч ОХУ-д үйлдвэрлэсэн бүрэн автомат удирдлагатай 250 ДМ маркийн Драгийн үйлдвэрийг 2003, 2005 онуудад Тосонгийн ордод “Монполимет” компани өөрийн хүч, хөрөнгөөр барьж байгуулсан бөгөөд тухайн үеийн уул уурхайн салбарын томоохон дэвшилтэд бүтээн байгуулалт болсон юм.

Одоогоор Дэлхий дахинд 6000 гаруй Драгийн үйлдвэр үйл ажиллагаа явуулж байна. Энэ үйлдвэр нь устай нөхцөлд ашигт малтмалыг олборлох, баяжуулах, олборлолт явуулсан газраа нөхөн сэргээхэд хамгийн өндөр үзүүлэлттэй шилэгдмэл технологиор шалгарсан техникийн үзүүлэлттэй юм.

Манай улсад Драгийн үйлдвэрийг 1972 оноос Толгойт, Ерөөгийн татмын ордуудад ашиглаж эхэлсэн бөгөөд Заамарын бүс нутагт 1994 оноос хойш  драгийн үйлдвэрүүд баригдаж үйл ажиллагаагаа явуулж байна.

Тосон үйлдвэр нь өнөөдрийг хүртлэх хугацаанд уул уурхайд мөрдөгдөж байгаа хууль дүрмийн дагуу жил болгон төлөвлөгөө тайлангаа холбогдох яам, агентлагуудаар батлуулж, түүний дагуу үйл ажиллагаагаа явуулж ирлээ.

Бид Монгол Улсын хэмжээнд “Уурхайн хаалт ба нөхөн сэргээлт” онол практикийн бага хурал, үзүүлэх сургалтыг МХЕГ болон Германы хамтын ажиллагааны BGR төсөл, Монголын Байгаль орчны мэргэжилтнүүдийн холбоо бусад байгаль орчны төлөөх ТББ-уудтай хамтран гурван удаа зохион байгуулж байсан бол энэ жил дээрхтэй адил үзүүлэх сургалтыг есдүгээр сарын 7-нд Тосон үйлдвэрийнхээ “Нөхөн сэргээлтийн үйлдвэр, сургалтын бааз” дээрээ зохион байгуулах гэж байна. Бидний үйл ажиллагааг үзэж сонирхох, буруу ташаа ойлголттой явдаг хүмүүсийг дээрх үйл ажиллагаанд оролцох боломжтойг энд дуулгая.

Гэтэл “Дэлхийн Монгол Ногоон Нэгдэл” ТББ-ын тэргүүн Х.Бээжин болон бусад хүмүүс драгийн үйлдвэр болон Тосон үйлдвэрийн технологийн онцлог, нөхөн сэргээлтийн үйл ажиллагааг зориуд, захиалгатайгаар олон нийтэд илт гүтгэн гуйвалсан, эрээ цээргүй мэдээлэл цацаж компанийг үүсгэн байгуулсан УИХ-ын гишүүн Ц.Гарамжавыг энэ бүх үйлдлийг гардан зохион байгуулж байгаа мэтээр илтэд гүтгэн, үндэслэлгүй мэдээлэл түгээсэн явдалд харамсаж байна.

Компанийг үүсгэн байгуулагч Ц.Гарамжав нь 2016 онд УИХ-ын гишүүн болсноор компанийн удирдах бүрэлдэхүүнээс албан ёсоор чөлөөлөгдсөн болно.

Өнөөгийн нөхцөлд мэргэжлийн инженер техникийн 500 гаад ажиллагсадтай тус үйлдвэрийг шинэ удирдлагын баг удирдаж байна.

Драгийн үйлдвэр нь гольдролын ордод ашигт малтмал олборлох, баяжуулах үйл ажиллагааг хамтад нь хийдэг ямар ч химийн нэмэлт бодис, тос тослох материал, шатахуун хэрэглэдэггүй цахилгаан хөдөлгүүртэй бүрэн автоматжсан, орчин цагийн шаардлага хангасан  эко үйлдвэр юм.

Бид өнөөдрийг хүртэл мэргэжлийн уул уурхайн компанийн хувьд уул уурхайн салбарын хууль дүрмийг дээдлэн ажилладгийн зэрэгцээ Усны тухай хуулийн 22-р зүйлд заасны дагуу онцгой хамгаалалтын бүсэд олборлолтын үйл ажиллагаа явуулаагүйг албан ёсоор мэдэгдэж байна.

Манай хамт олны олон жилийн турш уйгагүй хөдөлмөрлөж улс орон, гэр бүл, та бүгдийн төлөө хийж бүтээсэн бүгдийг минь мушгин гуйвуулаж, гүтгэн доромжилж, нэр хүндэд халддаг аливаа хууль бус үйл ажиллагааний эсрэг бид хатуу зогсож хуулийн дагуу тэмцэх болно.

“Монполимет” Группын захирал С.Энхтуяа