Нийслэлийн Сонгинохайрхан дүүргийн 32 дугаар хороо буюу эмээлтийн замд 2016 оны наймдугаар сарын 5-ны өдөр зам тээврийн ослын улмаас гэр бүлийн долоон хүний амь нас эрсэдсэн хэрэг гарчээ. Гэвч хуулийн байгууллагаас хохирогч талыг буруутай хэмээн дүгнэлт гаргаж, хэргийг хаасан байна. Амь үрэгдэгсдийн гэр бүлээс “Тангараг өргөсөн цагдаа, прокурорын шударга үнэн”-ийг шаардаж өнөөдөр мэдээлэл хийсэн юм.

Хохирогч Х.Пүрэвсайханы эгч Х.Алгирмаагаас тус хэргийн талаар тодрууллаа.

-Та тухайн болсон үйл явдлын талаар ярьж өгөөч?

-85-58 УНС улсын дугаартай Ланд 100 машин, приус 20 машиныг шахаж онхолдуулсны улмаас цаана нь орж ирж байсан 01-16 УНА улсын дугаартай Ланд 200 машинтай мөргөлдөж, замын хажуу руу шидэгдсэн байдаг. замын хажуу руу шидэгдсэнээс 20 орчим минутын дараа гал гарсан гэдэг. Тухайн үед хэргийн газар харж байсан хүмүүс ингэж хэлж байсан. Ланд машины хоёр жолооч аврах гэж оролдсон. Хөл гарнаас нь чангаагаад ямар ч гарч  ирэх боломжгүй байсан. Амь авраач гэж дуугарч байсан гэж ярьж байсан юм. яалт ч үгүй гал гарахад хүн дөхөж чадахаа байдаг юм байна лээ. Жаахан хүүхэд хүртэл үс нь шатаад байна аваач ээ гэж орилж байсан гэж Ландны хоёр жолооч хэлсэн. Харин шатаж дууссаны дараа шахсан гэх жолооч хэргийн газраас уул даван зугтаасан байдаг.

-Тухайн осол гарсан газарт хэчнээн гэрч байв? Гэрчийн мэдүүлэг юу гэж байсан вэ?

-Энэ машин шахаад тэгээд тэр машин энд мөргөлдсөн гээд харж байсан гэрч байгаа. Хойно нь явж байсан машины жолоочид ч энэ тухай хэлж байсан. Хамгийн гол нь гэрч бол бидэнд байгаа. Гэтэл тухайн Ландны жолоочид өөрсдөдөө  гэрч болоод мэдүүлэг өгөөд манай дүүгийн буруу болоод явж байна.

-Хэргийн газар хэзээ очсон бэ?

-Бид 22 цагийн орчимд хэргийн газар очсон. Гэтэл мэдүүлэгт 20 цагийн үед очсон байсан хэмээн бичсэн байсан.

-Осолдсон машинд хэчнээн хүн сууж явсан юм бэ?

-Осолдсон машинд миний дүү хоёр хүүхдийн хамт, хадам ээж, аав, эгч болон түүний гурван сартай нярай явж байсан. Өөрөөр хэлбэл дөрвөн том хүн, гурван хүүхэд явж байсан юм.

-Тухайн үед прокурорын дүгнэлт юу гэж гарав?

-Тус Ланд маркийн машинтай хоёр жолооч дүү рүү бүх буруугаа тохсон. Талийгаач болсон хүн рүү чихэхээр уг хэрэгт хариуцлага үүрэх хүнгүй болж байгаа юм. Прокурор яаж дүгнэлт гаргасан гэхээр дээрх хоёр машины ард сууж явсан хүмүүсийн мэдүүлгээр дүгнэлт гаргасан.

-Улаанбаатар хот руу хэргийг шилжүүлэх хүсэлтэй байгаа гэсэн. Хүсэлтээ гаргаж өгсөн үү?

-Уг нь аймгийн прокурорын газарт удаа дараа хүсэлт гаргасан ч боломжгүй гэсэн хариу өгсөн.

-Тэгвэл дээрх хоёр машины жолооч болон гэрч болоод  байгаа тэдгээр хүмүүс юу гэж мэдүүлэг өгсөн юм бэ?

-Шахсан гэх жолоочийг н.Цэцэншагдар гэдэг. Түүний мэдүүлэгт өгснөөр би шахаагүй, өөрөө урсгал сөрж ороод Ланд 200 машинтай мөргөлдсөн гэсэн мэдүүлэг өгсөн. Хөндлөнгийн гэрчийн мэдүүлгээр шахуулаад онхолдсон гэж ярьсан. Хэргийн материал дээр тухайн мөргөлдсөн гэх Ланд 200 машин 60-70 км цагийн хурдтай явж байсан гэсэн дүгнэлт байдаг. Харин Ланд 200 машины хойно явж байсан жолооч 120 км цагийн хурдтай явж байсан гэсэн гэрчийн мэдүүлэг бий. Намайг дөнгөж гүйцэж түрүүлээд л аваар хийсэн гэж ярьсан байдаг.

-Уг хэргийг хаасан байгаа гэсэн?

-Тийм. Одоогоор нээгээгүй байгаа. Долоо хоногийн дотор хүсэлт гарга гэсэн. Тэгвэл дахин нээх эсэхийг хэлэлцье гэсэн хариу өгсөн байна. Эзэнгүй хэрэг болгож хаагаад байгаа юм.

-Тус Ланд 200 машинд цагдаа нар сууж явсан гэсэн?

-Цагдаагийн ажилтнууд сууж явсныг хэргийн бүртгэлтэй танилцсан хойно мэдсэн. Тийм учраас энэ хэрэг нөгөө талдаа шийдэгдээд байна гэж харж байгаа.

-Хэргийг хаахад цагдаа нарын оролцоо байсан гэж харж байна уу?

-Өөрсдийн хийсэн хэргээ яаж авч гарахав гэдгийг биднийг бодвол цагдаа нар 100 хувь ойлгочихсон байгаа. Хэрэг гарсны дараа шууд цагдаагийн газар очиж чадаагүй. Учир нь ажил явдал гэж явсаар байгаад 20 орчим хоногийн дараа очсон юм. Ажил явдлаа дуусгаад очиход л бүх зүйл нөгөө талд гарчихсан байсан.

-Ланд машины эзэд ажил явдлын үеэр ч юм уу, танай гэр бүлтэй очиж уулзаж байв уу?

-Үгүй.

-Ерөнхийлөгч, Ерөнхий сайд, Хууль Зүйн байнгын хорооны дарга, Хууль зүйн сайд нарт хүсэлт явуулсан гэсэн. Хариу нь ирсэн үү?

-Тэгсэн. Хэргийн талаар хүсэлт дахин шалгуулах, төр хараандаа авч шударгаар шийдэж өгөхийг хүссэн хүсэлт явуулаад долоо хонож байна. Одоогоор Ерөнхий сайдаас хариу ирсэн байна.

-Ерөнхий сайдаас ямар хариу ирэв?

-Анх хэргийг хүлээж авсан байцаагч нь дутуу дулимаг мөрдсөн байна. Ингэж ажилласнаас болон энэ хэрэг ийм шийдвэртэй гарсан гэх дүгнэлт байдаг. Тухайн байцаагчийн гурван сарын цалинг 20 хувиар торгоод л өнгөрч байсан. Гэтэл бүхэл бүтэн долоон хүний амь нас яригдаж байгаа асуудал шүү дээ. Харин Ерөнхий сайдаас тухайн байцаагчид хариуцлага тооцож, дараа дараагийн шатанд тусална гэсэн.

Б.Лхам