Энэ сарын 26-27-ныг шилжих шөнө Эх, хүүхдийн эрүүл мэндийн төвийн төрөхийн өмнөх тасгийн зургаан давхарын цонхноор 17 настай жирэмсэн эмэгтэй үсэрч амиа хорлохыг завдсан юм. Азаар цагдаагийн ахлагч Н.Наянбаатар эмэгтэйн амийг нь аварсан гэх мэдээллийн дагуу манай сайт сурвалжлага хийлээ. 

Иргэний үүргээ биелүүлж, эмэгтэйн амийг аварсан ахлах ахлагч Н.Наянбаатар нь Чингэлтэй дүүргийн хороо хариуцсан ажилтан юм байна. Тэрбээр ажлаа тараад эгчийгээ эргэхээр ЭХЭМҮТ-д очсон байж таарсан байна. Ахтайгаа машин дотроо сууж байхад нь хүмүүс шуугилдах чимээ гарахаар нь дээш харвал тус эмнэлгийн зургаан давхарын цонхноор жирэмсэн эмэгтэй хөлөө унжуулан доошоо харан сууж байжээ. Хүмүүс "Амиа хорлож болохгүй" гэж хэчнээн ятгаж орилсон ч эмэгтэй  үсэрсэн байна. Яг энэ үед нь ахлах ахлагч Н.Наянбаатар эмэгтэйг дээлэн дээрээ тосон авч амийг нь аварчээ. Тухайн үйл явдал болсны дараа ЭХЭМҮТ-ийн эмч нар жирэмсэн эмэгтэйд төрүүлэх тусламж үзүүлж улмаар ГСҮТ-д хүргэсэн байна. Энэ талаар бид ГССҮТ-өөс тодруулахад “Гэмтлийн эмнэлэгт 01.10 цагт авчирсан. Авчирсан даруйд нь тусламж үзүүлсэн боловч хавсарсан хүнд гэмтэлтэй байсан тул  өглөө 07.05 цагт нас барсан” гэдэг харамсалтай мэдээ дуулгасан  юм. 

Тиймээс ЭХЭМҮТ-ийн Эх барих, эмэгтэйчүүдийн клиникийн захирал Б.Баттулгаас хэргийн талаар тодруулахад “Энэ талаар яамны хэвлэлийн албанд мэдээлэл өгсөн. Одоогоор энэ хэрэг шалгагдаж байгаа учир ярилцлага өгөх боломжгүй. Яамны хэвлэлээс тайлбар авах нь зүйтэй” гэсэн юм.

Харин Эрүүл мэндийн яамны эрх бүхий албан тушаалтнууд болсон хэрэгтэй холбогдуулан яаралтай хуралдаж байгаа бөгөөд "Гаднаас хэнийг ч оруулж болохгүй" гэж харуул гаргасан байна.

Хэдийгээр эх, ураг хоёр амиа алдсан ч түүнийг аврах чин хүсэл эрмэлзэл  өвөртөлсөн ахлах ахлагч Н.Наянбаатартай холбогдож хэргийн талаар тодруулахыг хүсэхэд тэрбээр зөвшөөрсөн юм. Ингээд түүнтэй хэсэгхэн хором ярилцснаа хүргэе.

-Та тэр эмэгтэйг амиа хорлох гэж байгааг яаж мэдсэн юм бэ?

-2019 оны гуравдугаар сарын 26-ны орой ЭХЭМҮТ-д хэвтэж байгаа эгчийгээ эргэхээр очсон юм. Ингээд хүргэнтэйгээ машин дотор юм яриад сууж байтал гэнэт хүмүүс хашхиралдаж эхэлсэн. Юу болсон юм бол гээд машиныхаа цонхоор хартал юу ч харагдаагүй. Гайхаад машинаасаа гараад хартал Эх нялхсын зурган давхараас нэг эмэгтэй хоёр хөлөө унжуулчихсан сууж байсан. Би доор нь очоод “Миний дүү болохгүй шүү, цаашаа ор” гэж ятгаж орилсон боловч хэлж байгааг минь сонсох сөхөөгүй байсан. Нөхцөл байдал нэг л биш болоод ирэхээр нь машин дотор байсан хүргэн ахынхаа дээлийг авч гурван талаас нь дэлгэж барихын хооронд нөгөө эмэгтэй дээлэн дээр бууж газарт унасан юм.

-Таны машин тухайн осол гарсан газартай хэр ойр байсан юм бэ?

-Эх нялхсын автомашины зогсоол дээр байсан. Ойролцоогоор 5-10 метрийн зайд байсан.

-Маш богино хугацаанд чадамгай ажилласан байна. Жирэмсэн эмэгтэйн амь насыг эсэн мэнд аврахад тухайн агшинд ямар сэтгэгдэл төрж байв?

-Тэр үед ажил тарчихсан байсан үе таарсан л даа. Гэхдээ цагдаагийн алба хаагч ямар ч нөхцөлд өргөсөн тангарагтаа үнэнч,  үүргээ гүйцэтгэх ёстой. Бид иргэдийн аюулгүй байдлыг хангах үүрэг хүлээсэн алба хаагчид. Хүний амь насыг аварна гэдэг үнэхээр бахархалтай сайхан байсан.

-Тухайн үед тэр эмэгтэйн биед ямар нэг ил харагдах гэмтэл учирсан уу?

-Тухайн нөхцөл байдалд ил харагдах гэмтэл, шарх сорви харагдаагүй.

-Гэвч өнөөдөр эх, ураг хоёул энджээ. Аваръя гэсэн чин хүсэл эрмэлзэлтэй байсны тань хувьд үнэхээр хүнд байгаа байх?

-Миний хувьд эх, үр хоёрыг хоёуланг нь аврах хүсэлтэй байсан. Харамсалтай нь эндсэн гэдгийг  сонсоод үнэхээр харамссан.

-Эмэгтэйг аварсны дараа ямар арга хэмжээ авсан бэ?

-Эх нялхасын эмч нар эмэгтэйг эмнэлэг рүүгээ аваад орсон. Дараахан нь Баянгол дүүргийн цагдаагийн жижүүрийн бүрэлдэхүүн ирж тухайн осол болсон газарт үзлэг, шинжилгээ хийсэн. Би орой нь цагдаад байцаалт өгсөн.

Р.Хишигжаргал