“Монголын геологи, хайгуул-2019" чуулга уулзалт өнөөдөр боллоо. УУХҮЯ, АМГТГ, МХЕГ, МУИС, ШУТИС, Монголын үйлдвэрлэлийн геологчдын холбоо хамтран зохион байгуулж байгаа уг чуулга уулзалтад 1000 гаруй зочид төлөөлөгчид, гадаад, дотоодын 100 гаруй хөрөнгө оруулагчид оролцож байгаа юм.

11 дэх удаагийн чуулга уулзалтыг нээж УУХҮ-ийн сайд Д.Сумъяабазар “Улсын төсвийн хөрөнгөөр 2019 онд гүйцэтгэх геологийн судалгааны ажилд нийт 24.6 тэрбум төгрөг зарцуулахаар шийдвэрлэсэн нь өмнөх оныхтой харьцуулахад даруй 11.3 тэрбум төгрөгөөр өссөн дүнтэй байна” гэсэн юм..

Чуулгын хүрээнд Засгийн газраас эрдэс баялгийн салбарт баримталж буй төрийн бодлого, хууль эрхзүйн орчин, хөрөнгө оруулалт, региональ судалгаа, ашигт малтмалын ордын эрэл хайгуулын аргачлал, техник технологи, геологи уул уурхайн төслүүдийн танилцуулга, үр дүн, эрдэс баялгийн салбарын өнөөгийн байдал, хэтийн төлөв зэрэг илтгэлүүд тавигдаж, хэлэлцүүлэг өрнүүлж байна.

Мөн уулзалтын хүрээнд ашигт малтмалын хайгуулын болон ашиглалтын тусгай зөвшөөрөл эзэмшигчид төслөө танилцуулж, хөрөнгө оруулалт татах зорилгоор хөрөнгө оруулагчдын бизнес уулзалтыг зохион байгуулсан олны анхаарлыг татсан юм. Учир нь Монгол Улсын нутаг дэвсгэрт энэ оны байдлаар 3377 лиценд байдаг. Үүний 1644 орчим нь Х лиценз буюу хайгуулынх юм. Харин үлдсэн 1600 гаруй нь А буюу ашиглалтын лиценз аж. Ашиглалтын 1600 лицензийн ихэнхийг цөөн тооны буюу 30 орчим гэр бүлийн хүрээний хүмүүс эзэмшдэг байна. Тэгвэл үлдсэн лиценз нь жирийн иргэд болон үйл ажиллагаа эрхлэгч залуусын гар дээр байдаг аж. Эдгээр иргэдийн хувьд хайгуулын үйл ажиллагааг маш хүнд нөхцөлд ажилладаг учир хөрөнгө мөнгөний гачигдалд орж, хайгуулын ажил зогсох эрсдэл тулгарчээ. Тиймээс УИХ-ын гишүүн асан Б.Батбаяр эдгээр залууст хөрөнгө оруулалт хийж эхэлсэн байна.

Түүний хувьд “Чингис ворлд майнинг” компанийн үүсгэн байгуулсан бөгөөд компаниараа дамжуулан тусгай зөвшөөрөл эзэмшигч 60 гаруй залуустай гэрээ байгуулж, хамтран ажиллаж байга юм байна. Тэрбээр энэ талаар “Хайгуулаа хийж чадахгүйгээсээ болж лицензийн төлбөрөө төлж чадахгүй хураалгах явдал их гардаг. Уул уурхайн салбарт ашигт малтмалын лицензтэй ч хөрөнгө босгож чадахгүйгээс тусгай зөвшөөрлөө хураалгахдаа тулсан том байгууллага биш, иргэн, залуустай хамтран ажиллаж эхэлсэн. Эдгээр залуус надтай хамтарч компани байгуулсан байгаа. Энэ бол гар дээрх лицензээ хураалгах гээд сандарсан залуусын нэгдэл. Эдгээр залуусын лицензийг би өөрийнхөө компанид шилжүүлж аваад, төлбөрийг нь төлж, хайгуул хийж өгч байнаа. Хамтран ажиллаж байгаа хүмүүсийнхээ өмнөөс манай компани хуулийн дагуу бүх татварыг төлдөг. Хайгуулын ажилд Японоос хөрөнгө оруулалт хийсэн. Тухайн лицензийн ордод илэрц байвал цаашид хамтран ажиллана гэсэн гэрээтэй ажиллаж байна. Гэтэл энэ төслийг буруу ойлгоод уул уурхайн ашиглалтын лицензтэй 30 гэр бүлийн нэг нь намайг гэж ойлгосон байна лээ. Тэр тийм биш шүү” гэв.

Г.Эрдэнэ