Шинжилгээний байгууллагын буруугаас болж эрүүл мэнд, амь нас нь хохирох аюулд хүрээд буй зургаан настай Э.Маргад-Эрдэнэ хүүд туслахаар монголчууд чадлынхаа хэрээр зүтгэж байна. Хүүг ээжийн хамт БНСУ-д эмчлүүлэхээр очих үеэр Солонгост ажиллаж, амьдардаг монголчууд тосон авч сэтгэлийн дэм хайрласан. Маш олон хүнд хагалгаа хийлгэсэн хүүгийн эмчилгээнд 900 сая төгрөг шаардлагатайгаас Монгол зон олны буянаар эмчилгээний төлбөрийн 300 гаруй сая төгрөг цуглаад байгаа юм. Тэгвэл уран зураг, уран барималын үе үеийн мастерууд нэгдэж Э.Маргад-Эрдэнэ хүүд сэтгэлийн дэм хайрлаж, эмчилгээний төлбөрт нэмэр болох үүднээс хандивын үзэсгэлэнг энэ сарын 8-11 хооронд зохион байгууллаа. Уг үзэсгэлэнг уран зураач Ж.Анунаран эгчийн хамт санаачилан, уран бүтээлчдийг уриалан дуудснаар 100 гаруй уран бүтээлчийн 108 бүтээл дэлгэснээс өдгөө 70 орчим хувь эзэнтэй болсон юм. Тэрбээр уг хандивын арга хэмжээний дараагаар бие даасан дөрөв дэх үзэсгэлэнгийнхээ бэлтгэл ажилд шамдахаар тун завгүй байх үеэр таарсан юм. Ингээд уран бүтээлч Ж.Анунарантай цөөн хором ярилцснаа хүргэе.
-Э.Маргад-Эрдэнэ хүүд туслах үзэсгэлэн ажиллуулах санаачлагыг өөрөө гаргаж, амжилттай хэрэгжүүллээ. Үзэсгэлэнд нийт хэдэн уран бүтээлчийн бүтээл оролцсон бэ?
-Нийтдээ 100 гаруй уран бүтээлчдийн 108 бүтээл оролцсноос 50 гаруй хувь эзэнтэй болсон.
-Эдгээрээс хэдэн төгрөг цугларсан бэ?
-Ойролцоогоор 20 гаруй сая төгрөг цугласан. Нарийн тоо гаргаж амжаагүй байна.
-Үзэсгэлэнд оролцуулах бүтээлд ямар нэг шалгуур тавьсан уу. Эсвэл уран бүтээлчийн өгсөн бүтээл бүрийг шууд хүлээж авсан уу?
-Хандивын арга хэмжээ гэдэг утгаараа уран бүтээлчид маань өөрсдийн сэтгэлээ шингээсэн бүтээлээ өгсөн. Энэ утгаараа ямар нэг шалгуур тавиагүй.
-Үнэлгээг яаж тогтоосон бэ?
-Уран бүтээлчид өөрсдөө бүтээлийнхээ үнэлгээг гаргасан. Гэхдээ хандивын арга хэмжээ учир зах зээлийнхээ үнээс маш хямд үнээр үнэлсэн. Гэхдээ үнэлгээг хатуу тогтоогоогүй. Хэрвээ та уран зураг худалдаж авахыг хүсвэл бага зэрэг хямдуулж авах боломжтой.
-Үзэсгэлэнд таван хүүхдийн уран бүтээл оролцсноос өөрсдийн нэрлэсэн үнээс өндөр үнээр худалдагдсан гэсэн. Үүн шиг уран бүтээлчийн нэрлэсэн үнээс давсан үнээр худалдагдсан хэдэн бүтээл байгаа вэ?
-Яг ийм тохиолдол цөөхөн. Үзэсгэлэнгээс уран бүтээл худалдаж авсан иргэд зураг цуглуулах гэхээс илүүтэй Маргад-Эрдэнэ хүүд туслах сэтгэлээр худалдаж авсан. Энэ дунд боломжтой хүн ч байна. Боломж тааруу хүн ч бий.
-Үзэсгэлэнд До.Болд, хөргийн мастер Насанцэнгэл, монгол зургийн Бадам гээд мастерууд оролцсон. Уран бүтээлчид цаашдаа ийм арга хэмжээнд оролцох сонирхол хэр байдаг юм бэ?
-Маргад-Эрдэнэ хүүгийн бие тааруу байгааг сонсоод түүнд туслах ёстой гэсэн бодол төрсөн. Эгчдээ энэ талаар хэлэхэд дэмжсэн. Ингээд ажлын төлөвлөгөө гаргаж, цөөн хэдэн уран бүтээлчтэй уулзаж, санал тавьсан. Тэгэхэд маш уриалагханаар хүлээж авсан. Анх ийм олон уран бүтээлч оролцоно гэж бодоогүй. Гэтэл “Энэ зураач сонслоо. Би оролцож хүүд туслая” гэж олон хүн хандсан. Дээр нь бид мэдээллээ сошиалаар тараасан учир эндээс мэдээлэл авч ирсэн уран бүтээлчид олон бий.
-Оролцох бүтээлийнхээ тоог билэгдлээ бодож 108-аар тогтоосон уу?
-Яг тэгж төлөвлөгөөгүй. Галерейн орон зайн багтаамж, дээр нь үзэсгэлэн нээлт хийх цаг тулсан байсан учраас бүтээлийнхээ тоог 108-аар барихаас өөр арга байгаагүй. Түүнээс биш оролцох сонирхол уран бүтээлчид олон байсан. Үзэсгэлэнд бүх үеийн уран бүтээлчид оролцсон. Ахмад уран бүтээлчдээс эхлээд сургуулиа дөнгөж төгссөн, одоо суралцаж байгаа гээд. Бүр зургаан настай зураачид хүртэл оролцсон. Хүүг эдгээсэй гэдэг чин сэтгэлээр эдгээр уран бүтээлчид хандсанд маш их баярласан.
-Э.Маргад-Эрдэнэ хүүгийн ангийн хүүхэд нь зурсан зургаа өгсөн гэсэн үү?
-Тийм. Ангийн таван найз нь зургаа хандивласан.
-Зураачдаас гадна уран барималчдын бүтээл оролцсон байна лээ. Уран бүтээлчдийн нэрсийг дурдвал?
-Барималын хувьд барималын мастер А.Очирболд “Үүлэн чөлөөний нар” гээд ган бүтээл, Дорждэрэм “Орон зай дахь дуу хоолой”, Цагаанаа “Анхны цас”, керамикийн уран бүтээлч Сүхбүрэн “Мартагдсан төгс төгөлдөр” зэрэг олон бүтээл хандиваар ирсэн. Хамгийн гол бүтээл худалдаж авсан иргэдэд “Маргад-Эрдэнэ хүүд туслах хандивын үзэсгэлэнд өөрийн хувь нэмрээ оруулсанд талархал илэрхийлье” гэсэн утгатай батламжийг хамт өгч байгаа.
-Э.Маргад-Эрдэнэ хүүтэй холбоо барьсан уу?
-“Маргад-Эрдэнэ миний эрдэнэ” гэсэн пэйж хуудас байдаг юм билээ. Пэйж хуудаст тавигдсан мэдээллийг шэйр хийсэн хүнтэй холбогдоход хүүгийн ангийнх нь хүүхдийн ээж байж таарсан. “Хүүд туслах хүсэлтэй байна. Юу хийж чадахаа мэдэхгүй байна. Гэхдээ л тусламаар байна” гэж хэлэхэд ээжтэй нь холбож өгсөн. Гэхдээ богинохон хугацаанд ярилцсан л даа. Хүүгээ асрахаас эхлээд их завгүй байна лээ. Дараа нь Маргад-Эрдэнийн эгчтэй нь уулзсан. СУИС-ийн бүжгийн урлагийн ангид суралцдаг юм билээ. Эгчтэй нь биечилж уулзахдаа нөхцөл байдлын мэдээллийг авсан. СУИС-ийн зүгээс “Оюутан театр”-тай хамтарч хандивын тоглолт зохион байгуулсан юм билээ. Ингэж л хүүгийн талаарх мэдээллийг аваад ажлын төлөвлөгөө гаргасан даа.
-Магадгүй дахиад нэг хүүхдэд ийм бэрхшээл тулгарч, та бүхнийг туслаач гэвэл дэмжиж ажиллах уу?
-Их хэцүү асуулт байна. Бидний хувьд төрийн бус байгууллага ч юм уу, эсвэл ямар нэг нэгдсэн зохион байгуулалтад орсон хүмүүс биш шүү дээ. Хүүд туслахын тулд энэ арга хэмжээг санаачилж, өрнүүлсэн нэг удаагийн ажил. Магадгүй дараагийн удаа өөр хэн нэгэн үүнийг үргэлжлүүлэх нь зүйтэй болов уу. Түүнээс бид ийм арга хэмжээг байнга зохион байгуулах нь чухал биш байх. Өөр хэн нэгэн зохион байгууллаа гэхэд “Бид ч гэсэн бусдад туслах боломжтой юм байна” гэдэг ойлголт авах хэрэгтэй болов уу. Фэйсбүүкт “.......... нэгдлээ” гэдэг дээ. Үүн шиг гэсэн. Энэ л бидний зорилго.
Сэтгэгдэл (1)