Төв цэвэрлэх байгууламжид бохир соруулах насосны хийнд хордсон таван иргэн Цэргийн төв эмнэлгийн Хордлогын тасагт хүргэгдэн эмчлүүлж байна. Эдгээр иргэдийн биеийн байдал ямар байгаа талаар Цэргийн төв эмнэлгийн дарга, Ерөнхий эмч, хурандаа С.Батболдоос тодрууллаа.
-Төв цэвэрлэх байгууламжийн ажилчид химийн бодист хордсон, хордоогүй гэх янз бүрийн яриа байна. Та үүнд тодорхой хариулт өгөхгүй юу?
-Эдгээр иргэд холимог хийнд хордсон. Эмнэлэгт хүргэгдэж ирсэн даруйд нь Хордлогын төвийн болон яаралтай тусламжийн эмч нарын баг шуурхай ажиллаж, холбогдох арга хэмжээ авсан. Эмчлүүлэгчдэд хагалгаа хийх хэмжээний хүндрэлтэй зүйл байгаагүй.
-Ямар эмчилгээ хийж байна вэ?
-Хордлого тайлах, даралтад хүчилтөрөгчийн эмчилгээ хийж байна. Осол болсон шөнө дахиад зургаан ажилчин хордлогод орсон шинж тэмдэгтэй ирсэн. Тэдгээрийн гурав нь биеийн байдал хэвийн байсан учир хэвтэн эмчлүүлэхээс татгалзсан. Эмчлүүлэгчдийн биеийн байдал эрс сайжирч байна.
-Одоо найман иргэн хэвтэн эмчлүүлж байгаа гэсэн үг үү?
-Тийм. Найман иргэн хэвтэн эмчлүүлж байгаагаас нэг нь эмэгтэй хүн байна. Насны хувьд 25-55 насны хүмүүс.
-Холимог хийн хордлого гэж яг ямар хордлогыг хэлдэг юм бэ?
-Тодорхой бус хийн хордлого гэж ойлгож болно. Төв цэвэрлэх байгууламжийн лагаас гарч байгаа зүйл нь амек, шивтэрийн хий байдаг. Үүний зэрэгцээ метаны хордлого байхыг үгүйсгэхгүй. Тиймээс холимог хийн хордлого байж магадгүй хэмээн оношилж эмчилгээ хийж байгаа юм.
-Хортой хий нь эдгээр иргэдийн эрүүл мэндэд хожим ямар нэг эрсдэл үүсгэх эрсдэлтэй юу?
-Урьдчилан тогтоох боломжгүй. Цусан дотор орсон тухайн хийн концентрацыг арилгасан. Одоогоор хордлогод орсны улмаас сэтгэц, бие организм, эд эрхтэнд нөлөөлсөн шинж тэмдэг ажиглагдахгүй байна.
Б.Лхам
Сэтгэгдэл (1)