Өнөөдөр нийслэлийн хэмжээнд үйл ажиллагаа явуулж буй бүх шатахуун түгээх станцууд шатахууны үнийг нэмжээ. Тодруулбал, АИ-92 бензин литр тутамдаа 70-80 төгрөг, дизель түлшний үнийг 30-35 төгрөгөөр тус тус нэмэгдүүлжээ. Харин АИ-80 бензиний үнэ нэмэгдээгүй байна.

“Шатахууны үнэ нэмэгдэж байгаа шалтгаан нь гадаад хилийн үнэ нэмэгдсэнтэй холбоотой. Гэхдээ шатахуун импортлогч компаниудын үнээ нэмсэн уг асуудал үнэхээр бодитой эсэх талаар хяналт гарган ажиллаж байна” хэмээн ШӨХТГ-ын мэргэжилтэн Д.Мөнхсолонго тайлбарлаж байна. Учир нь аж ахуйн нэгжүүд энэ сарын ихээр дээрх асуудлаар бараа бүтээгдэхүүний жижиглэнгийн үнийг нэмэгдүүлэх зайлшгүй шаардлага бий болсон агуулга бүхий албан бичгийг ШӨХТГ-т хүргүүлж байсан юм. Харин ШӨХТГ-аас Хамтарсан зөвлөлийг хуралдах хүртэл шатахууны үнийг нэмэгдүүлэхгүй байх чиглэл өгсөн ч энэ сарын 6, 7-ны өдрүүдэд “Петростар”, “Магнай Трейд”, “Тэс Петролиум”, “Шунхлай Трейдинг” зэрэг компаниуд үнээ литр тутамдаа 15-50 төгрөгөөр нэмэгдүүлсэн байдаг.

Улмаар ШӨХТГ-аас шатахууны үнийн өсөлттэй холбогдуулан яаралтай Хамтарсан зөвлөлийг хуралдуулах албан бичгийг энэ сарын 3-ны өдөр хүргүүлсэн ч зөвлөл одоог хүртэл хуралдаагүй байна. Өөрөөр хэлбэл, Хамтарсан зөвлөл хуралдах эсэх нь тодорхойгүй байх хооронд шатахууны үнэ нэмэгдсээр л байна. Уг нь шатахууны үнийг барих бодлого хэрэгжүүлнэ. Шат дараатай үнийг бууруулна хэмээн салбарын сайд хэлж байсан билээ. Сайдын хэлснээр шат дараатай буурах ёстой шатахууны үнэ дахин тэнгэрт хадах нь ээ. Хамтарсан зөвлөлийн ахлагчаар УУХҮ-ийн сайд ажилладаг бол нарийн бичгийн даргаар АМГТГ-ын дарга нар тус тус ажилладаг юм байна.

Шатахууны үнэ өсөх болсон шалтгаан нь гадаад хилийн үнэ нэмэгдсэнтэй холбоотой хэмээн тайлбарлаж байгаа. Яахав нэмж болно. Гэвч гадаад хилийн үнэ гээчид нь нэг асуудал байна. Тухайлбал, шатахууны гадаад хилийн үнэ гуравдугаар сард шатахуун тонн тутамдаа 29 ам.доллараар, дөрөвдүгээр сард 71 ам.доллараар өсчээ. Харин тавдугаар сард 47 ам.доллараар өсөх тооцоо гаргажээ. Эндээс харахад шатахууны гадаад хилийн үнэ тогтмол өссөн нь харагдаж байгаа ч үнийн хувьд буурсан байна. Ийнхүү шатахуун импортлогчдын зүгээс гадаад хилийн үнэ тасралтгүй өсч байна гэсэн шалтгаанаар литр тутмын үнийг нэмэгдүүлжээ.

Б.Лхам