Дулааны улирал эхэлж барилгын ажил эхэлж байгаатай холбогдуулан нийслэлийн Мэргэжлийн хяналтын газраас төлөвлөгөөт шалгалт хийж байна. Уг ажилтай холбогдуулан НМХГ-ын Дэд бүтцийн хяналтын хэлтсийн дарга Н.Гантулгатай ярилцлаа.
-Барилгын ажлын үйл ажиллагаанд хийж байгаа хяналт, шалгалтын явцын талар мэдээлэл өгнө үү?
-Нийслэлийн Мэргэжлийн хяналтын газраас нийслэлийн бүх дүүргүүдэд дэд бүтэц, хөдөлмөрийн аюулгүй байдлын чиглэлээр төлөвлөгөөт урьдчилан сэргийлэх, хяналт шалгалтыг өчигдрөөс эхлүүллээ. Уг ажлыг энэ сард багтаан явуулахаар төлөвлөсөн. Эхний ээлжид Хан-Уул болон Баянзүрх дүүрэгт хоёр ажлын хэсэг гаран ажиллаж байна. Хан-Уул дүүргийн ажлын хэсгийг би ахлан ажиллаж байна. Хяналт, шалгалтаар Монгол Улсад мөрдөгдөж байгаа дэд бүтцийн хууль, дүрэм, стандарт, хөдөлмөрийн аюулгүй байдал, Барилгын тухай хууль, Авто замын тухай хууль, Эрчим хүчний тухай хууль зэрэг холбогдох хуулийн хэрэгжилтийг шалгана. Мөн бичиг баримт, зөвшөөрөл, тухайн объектод ажиллаж байгаа ажиллагсдын ажлын байрны тодорхойлолт, бусад техник хэрэгсэл, албан тушаал, хөдөлмөрийн аюулгүй байдал зэргийг шалгаж байна.
-Энэ хугацаанд Хан-Уул дүүргийн хэдэн хороонд ажилласан бэ?
-Хан-Уул дүүргийн IV, V хороон дахь барилгын нийт зургаан төсөл, 30 барилгыг шалгасан.
-Ямар зөрчил илэрсэн бэ?
-Барилга дээр ашиглаж байсан суурин кранын ашиглалтын хугацаа дууссан, магадлалаар ороогүй, зөвшөөрөл аваагүй гэсэн гурван зөрчил илэрч үйл ажиллагааг нь зогсоосон. Мөн техникийн нөхцөл авагдаагүй зөрчил гарсан. Тухайлбал, ус хангамж, дулааны техникийн нөхцөл аваагүй байна. Уг зөрчлийг арилгуулахаар хугацаатай үүрэг даалгавар өгсөн. Түүнчлэн барилгын компаниуд тухайн газартаа ухсан худгын усыг үйл ажиллагаа, ахуй аль алинд нь ашиглаж байсан. Үүнийг шалгаж шинжилгээний бичиггүй худагтай компанийн эрхийг түр хугацаагаар зогсоосон.
-Ажилчдын хөдөлмөрийн аюулгүй байдлын хувьд ямар байсан бэ?
-Шалгалтаар орсон газруудад ажилчдын хувцас хэрэглэл бүрэн байсан төдийгүй хамгаалалт, бусад санамж, анхааруулга, сэрэмжлүүлэг зэрэг шаардлагатай зүйлийг байршуулсан байсан. Мөн ажилчдад зааварчилгаа өглөө бүр өгч, зааварчилгааныхаа дэвтрийг тогтмол хөтөлж хэвшсэн байна. Тиймээс хөдөлмөрийн аюулгүй байдлыг хангуулах тал дээр ямар нэгэн асуудал гараагүй.
-Барилгын компаниуд зөвшөөрөлгүй гаднын ажилчид ажиллуулж байна гэсэн мэдээлэл байна. Ийм зөрчил илэрсэн үү?
-Зарим төслүүдэд БНХАУ-ын ажилчид ажиллаж байсан. Зарим гаднын ажилчид гэрээгээр ажиллах ёстой барилгаасаа өөр барилгад ажиллаж байсан зөрчил илэрсэн. Тйимээс тухайн ажилчдыг анх хилээр оруулж ирсэн компанид үүрэг өгсөн. Мөн Гадаадын иргэн харьяатад албан бичиг хүргүүлэх гэж байна. Тухайлбал, “Бөхбат” компанийн барилгын талбай дээр ажиллах зөвшөөрэлтэй хятад улсын ажилчид өөр барилгын талбайд ажиллаж байсан. Уг нь гадаадын ажилчид Н2 визийн зөвшөөрлийн дагуу ажиллах ёстой.
-Тэгэхээр нэг компанийн нэр дээр Монгол улсад нэвтрэх виз аваад өөр компанид шилжин ажилладаг байх магадлалтай гэсэн үг үүе?
-Байх магадлалтай. Үүнийг холбогдох байгууллага нь шалгах байх.
-Шалгалтын явцад үйл ажиллагааг нь зогсоох ноцтой зөрчил гаргасан компани байв уу?
-Эдгээр барилгын компаниуд нь барилга барих зөвшөөрөлтэй учраас үйл ажиллагааг нь зогсоох хэмжээний үндэслэл гараагүй.
Б.Лхам
