“Хүнд тусламж хэзээ ч илүүддэггүй. Тусламж заавал том байхдаа албагүй, жижиг тус ч гэсэн цагаа олбол агуу зүйлийг бүтээх шидтэй” хэмээх ярих нэгэн охинтой танилцаад хэсэгхэн хором ярилцсан юм. Тэгэх зуур XXI зууны Монгол залуусын аливааг сурч мэдэхийн төлөөх хүсэл тэмүүлэл, бусдад тусалж, бусдад өгөхийг хүссэн чин сэтгэлийг эрхгүй мэдэрсэн юм. Ингээд нийгмийн сайн сайхны төлөө залуу манлайлагч “Залуучуудын улаан загалмай” клубийн тэргүүн С.Шинэгэрэлтэй ярилцсанаа хүргэе.
-Бусдад туслах, бусдаас суралцах нь хүмүүний насан туршийн үйл хэмээдэг. Танай клубын талаарх эерэг мэдээллийг өмнө нь цөөнгүй удаа сонсч байлаа. Ярилцлагынхаа эхэнд клубынхээ талаар танилцуулахгүй юу?
-Монголын улаан загалмайн нийгэмлэгийн харьяа МУИС-ийн “Залуучуудын улаан загалмай” клуб нь хүүхэд, залуучуудыг хүмүүнлэгийн үйлсэд уриалан оролцуулж, хүнлэг энэрэнгүй үзэл санааг төлөвшүүлж, тэдний оролцоонд тулгуурлан нийгэмд бодитой хувь нэмэр оруулах эрхэм зорилготой. Хүмүүнлэгийн эрх зүй, эрүүл мэндийг дэмжих, гамшгийн менежмент, нийгмийн оролцоог дэмжих, хамтын ажиллагааг дэмжих, манлайлал ба залуучуудын оролцоог дэмжих гэсэн үндсэн чиглэлээр ажилладаг. Тухайлбал, Дэлхийн сайн үйлсийн өдөр, Цусаа бэлэгдэх өдөр, Дэлхийн усны өдөр, Дэлхийн эрүүл мэндийн өдөр, Олон улсын ахмадын өдөр зэрэг тэмдэглэлт өдрүүдэд нийгэмд тустай үйл ажиллагааг өнгөрсөн оноос эхлэн явуулж байна.
-Энэ хугацаанд хэчнээн хүмүүнлэгийн ажил зохион байгуулсан бэ?
-Гамшгаас хамгаалах иж бүрэн сургуулилтад Монголын улаан загалмай нийгэмлэг нь Гамшгаас хамгаалах тухай хуульд заасны дагуу Үндэсний нийгэмлэгийн гамшгийн хариу арга хэмжээ авах баг, дунд шатны хорооны гамшгийн хариу арга хэмжээ авах, баг сайн дурын идэвхтэнүүд нийлсэн 419 хүний бүрэлдэхүүнтэй оролцсон. Иж бүрэн сургуулийн үеэр нэг цаг дор, өөр өөр нутаг дэвсгэр, байршилд улаан загалмайн сайн дурын идэвхтэнүүд анхны тусламж, нийгэм-сэтгэл зүйн дэмжлэг үзүүлж, газар хөдлөлтийн гамшгаас сэргийлэх сурталчилгааны материал тараах зэрэг үйл ажиллагааг амжилттай зохион байгуулсан. Түүнчлэн шинэ жилийн баярын өдрийг тохиолдуулан хүүхдийн бэлгийн хандивын аян зохион байгуулж, цугларсан бэлгийг Сүхбаатар дүүргийн XVI хорооны зорилтот бүлгийн хүүхдүүдэд өгсөн. Мөн дауны синдромтой хүүхдүүдэд “Гараа хэрхэн угаах-Цэвэр гар”, “Галын аюул-гал гарвал яах вэ” зэрэг сургалтуудыг хөгжөөнт тоглоом тоглох маягаар явуулж, асрамжийн газрын ахмад настнуудтай нэг өдрийг хамт өнгөрүүлэх зэрэг өөрсдийн санаачилсан болон тухайн байгууллагаас зохиосон арга хэмжээнд идэвхтэй оролцдог. Одоо “Хайр” аян зохион байгуулж байна.
-“Хайр” аяны хүрээнд ямар ажил хийж байгаа вэ. Яагаад хайр гэж нэрлэсэн юм бэ?
-Бид асрамжийн газрын өндөр настнууд, хөгжлийн бэрхшээлтэй хүүхдүүдэд сэтгэлийн дэм, урам өгөхийг зорьсон тул хайр гэж нэрлэсэн. Энэ аяны хүрээнд нийт зургаан үйл ажиллагаа зохион байгуулахаар төлөвлөсөн. Үүний тавынх нь ард амжилттай гараад байна. Тухайлбал, Улаанбаатар хотоос 98 км-ын зайд байрлах Төв аймгийн Батсүмбэр сумын “Өндөр настны үндэсний төв” хуучнаар “Улсын асрамжийн газар”-т очиж нэг өдрийг ахмад, буурлуудтайгаа хамт өнгөрөөсөн. Нийслэлийн Сүхбаатар дүүргийн хоёрдугаар цэцэрлэгийн ахлах, бэлтгэл бүлгийн 4-6 насны нийт 60 хүүхэд багачуудад “Сургуулийн өмнөх насны хүүхдэд гамшгаас хамгаалах мэдлэг, дадлага олгох нь” сэдэвтэй хөгжөөнтэй үр бүтээлтэй сургалт орсон. “Хүүхдийн төв сувилал” -ийн бяцхан дүү нартайгаа нэг өдрийг өнгөрүүлсэн. “Хүүхдийн төв сувилал” нь хөгжлийн бэрхшээлтэй, байнгын асаргаа сувилгаа шаардлагатай хүүхдүүд байдаг. Бага бүлэг нь 0-2 насны 15 хүүхэдтэй хоёр сувилагч асардаг юм байна лээ.
Түүнчлэн “Хүүхдийн төв сувилал”-д ногоо тарих талбайг нь хагалах зэргээр ажлыг нь нугалж өгсөн. Мөн голын эрэг дагуух хогийг түүж байгаль орчноо хогноос салгахад өөрсдийн хувь нэмрээ оруулсан. Харин зургаа дахь үйл ажиллагаагаа сургуульдаа донорын өндөрлөг болгон зохиохоор төлөвлөсөн.
-Ахмад настнуудад их тусалдаг юм байна. Тэдэнтэй цагийг өнгөрөөхөд ямар байдаг вэ?
-Бидний төсөөлшгүй амьдралыг туулсан хүмүүс олон байдаг юм билээ. Тэдэнтэй ярилцаж, амьдралын мөн чанар олон зүйлийг таньж мэддэг. Ер нь ахмад настнуудтай хамт хөгжилдөж, цагийг өнгөрөөхөд гоё байдаг. Миний хувьд хүмүүнлэгийн ажил хийж эхлээд дөрвөн жил болж байна. Энэ хугацаанд бусад хүнд тус болохоос гадна хувь хүн талаасаа их хөгжсөн. Их сургуульд зааж өгдөггүй олон зүйлийг би хүмүүнлэгийн ажил хийж явах хугацаандаа мэдэж, ухаарсан тул хүмүүнлэгийн ажлыг орхиж чаддаггүй юм.
-Хичээлийн хажуугаар хүмүүнлэгийн ажил хийх нь амаргүй юм шиг ээ. Хэрхэн зохицуулдаг вэ?
-Цагийн менежмент, төлөвлөгөөтэй байж л аливаа зүйлийг амжуулдаг гэж боддог. Тиймээс үйл ажиллагаа, төлөвлөгөө гээд жижиг зүйл байсан ч бүгдийг нь тэмдэглэж авахыг хичээдэг.
-Клубынхээ санхүүг яаж зохицуулдаг юм бэ?
-Манай клуб гишүүдээсээ жилд 6000 төгрөгний хураамж авдаг. Үүний 3000 төгрөгийг Улаан Загалмайн нийгэмлэгт оруулж, үлдсэнийг нь клубтээ төсөв болгон оруулдаг.
-Цаашид ямар үйл ажиллагаа хийхээр төлөвлөж байна вэ?
-Зүрхний дөрөвлөсөн гажигтай хэмээн оношлогдсон Энэрэл бяцхан охинд туслахаар болсон. Энэ өвчнийг Монголд эмчлэх ямар ч боломжгүй бөгөөд яаралтай гаднын улсад мэс засал хийлгэх шаардлагатай байгаа. Тиймээс сайн санаат монголын ард түмэн Энэрэл охинд гараа сунгаасай гэж хүсч байна.
Б.Лхам
