Цэргийн алба хүнийг хүмүүжүүлдэг биш “яргалдаг” газар болж хувирлаа. Тухайлбал, хэдхэн хоногийн өмнө гэхэд л эх орноо хамгаална гээд мордсон хүү энэ сарын 14-ны өдөр дунд чөмөг нь хугарсан оноштойгоор эмнэлэгт хүргэгдсэн юм.
Хачирхалтай нь уг хэрэг ч өас гаднын нөлөөгүй гэж тайлбарлаж байна. Мөн өнгөрсөн нэгдүгээр сард Дорноговь аймгийн Зүүнбаян дахь Зэвсэгт хүчний 336 дугаар ангид алба хааж байсан хугацаат цэрэг амиа алдсан хэрэг гарсан. Энэ хэрэг ч гаднын нөлөөгүй хэмээн албаныхан дүгнэсэн юм.
Түүнчлэн энэ долоо хоногт ерөнхий боловсролын сурагчдын дунд сүрьеэгийн халдвар асуудал дагуулж эхэллээ. Урьдчилсан байдлаар Хан-Уул дүүргийн 15 дугаар сургуулийн 529 хүүхэд сүрьэгийн халдвараар авч, 38 сурагч өвчилжээ. Мөн Төв аймгийн Сүмбэр суманд сүрьеэ өвчлөлийн зургаан шинэ тохиолдол, халдвар авсан 200 хүн авсан байна.
Нийслэлийн 15 дугаар сургуулийн хувьд хэдэн жилийн өмнөөс л энэ төрлийн халдварын голомттой гэдэг яриа гарч байжээ. Өнөөдөр сургуулиараа шахуу сүрьеэгээр халдварлачихаад байхад одоог хүртэл эрсдэлтэй байршлуудад карантин тогтоох арга хэмжээ аваагүй байна. Хамгийн ноцтой нь өнгөрсөн онд тус сургуулийн 20 орчим сурагч сүрьеэ өвчнөөр өвдсөн талаар мэдээлэл гарахад тус сургуулийн захирлаас эрс үгүйсгэж, уг мэдээллийг дарж байсан юм. Гэвч өнгөрсөн онд цахим сүлжээгээр гарч байсан мэдээлэл үнэн болох нь нотлогдож, сургуулиараа халдвар авахад хүрлээ. Тухайн үед цаг тухайд нь сурагчдыг шинжилгээнд хамруулахын оронд нуун дарагдуулсан тус сургуулийн захирал Ө.Шүрэнцэцэг дулаан суудалдаа тухалсаар байх нь хэр шударга вэ.
Эрүүл мэндийн салбарт ийн гажуудал үүссэн нь салбараа мэдэхгүй сайдаар удирдуулсантай холбоотой гэж цахим сүлжээ болон хэвлэл мэдээллийн хэрэгслээр олон хүн байр сууриа илэрхийлж байна. Дээрх асуудалтай холбогдуулан иргэд болон төрийн бус байгууллагуудаас салбарын сайд Д.Сарангэрэлийг өөрийн хүсэлтээр ажил үүргээсээ чөлөөлөгдөхийг шаардаж байна. Түүний суудал ганхсан энэ үед туслах Б нь авлига авч байгаад үйлдэл дээрээ баригдсан юм. Б-г албан тушаалаа ашиглан авлига авсан асуудлаар АТГ-аас шалгаж байгаа бөгөөд түр саатуулаад байгаа юм.
Түүнчлэн долоон настай охины дөрвөн хурууг цавчиж, толгойн тус газар нь гэмтэл учруулж, халуун ус цацсан аймшигт хэрэг олон нийтийг цочроогоод байна. уг хэргийг үйлдсэн этгээд нагац ах нь бөгөөд тэрбээр “Би согтуу байсан. Санахгүй байна. Ийм хэрэг хийгээгүй байх” зэргээр мэдүүлжээ. Охины гурван хурууг залгасан бөгөөд нэг хуруу нь аль хэдийн үхэжсэн байсан тул залгаж чадаагүй гэж эмнэлгийн байгууллагаас мэдээлж байгаа юм.
Мөн нэгдүгээр сарын 8-ны өдөр Улаанбаатар-Дорноговь аймгийн чиглэлд зорчиж байсан автобус осолдож 31 хүн бэртэж, хоёр иргэн амь насаа алдсан хэрэг гарсан. Тэгвэл уг ослын үед хүнд гэмтэл авч, ГССҮТ-д хүргэгдэн эмчлүүлж байсан иргэн өвчний хүндрэлээ даалгүй амиа алдсан харамсалтай хэрэг гарсан юм.
Энэ долоо хоногоос эхлэн түүхий нүүрсийг нийслэл рүү оруулж ирэхийг нь хориглож, шахмал түлш худалдаалж эхэллээ. Харин иргэдэд байгаа түүхий нүүрсийг шахмал түлшээр сольж авахаар болжээ. Ийнхүү “гаднын нөлөөгүй” цэргийн тоо нэгээр нэмэгдэж, сургуулиараа шахам сүрьеэгээр халдварласан долоо хоног болж өнгөрлөө.
Б.Лхам
Сэтгэгдэл (6)