БНХАУ-ын “Тяньжин фүүдс” компанид 50 га газарт хүлэмжийн аж ахуй эрхлэх зөвшөөрлийг олгосон тухай асуудал өнгөрсөн сараас эхлэн маргаан дагуулж буй.

Засгийн газрын хэмжээнд хоёр улсын хамтын ажиллагааг өргөжүүлэх, хамтран ажиллах хэлэлцээр хийж, тодорхой ажил хэрэгжүүлэх хүрээнд Тяньжин хотын захиргаатай хамтран хүлэмжийн аж ахуй эрхлэх ажлыг судлах чиглэл өгсөн талаар хотын дарга С.Амарсайхан тухайн үед мэдэгдэж байсан юм. Тэгвэл өнгөрсөн долоо хоногт “Тяньжин фүүдс” компанийн төлөөллүүд Улаанбаатарт ирж, хүлэмжийн аж ахуй эрхлэх талбайтайгаа танилцжээ.

Нийслэлээс хүлэмжийн аж ахуй эрхлүүлэхээр бэлдсэн 50 га хоёр газар байгаа аж.  Хэрэв Хятадын компаниас газраа сонгочихвол цахилгаан, шугам сүлжээ зэрэг бүхий л ажлыг нийслэлээс хийж өгөх юм байна.

Гэвч Хятадын 100 хувь өмчит компанид 50 га газарт хүлэмж эрхлүүлэх нь энэ чиглэлээр үйл ажиллагаа явуулдаг иргэдийг зах зээлээс түлхэх цаашлаад хүнсний аюулгүй байдал алдагдах аюултайг хүлэмж эрхэлдэг Монголын аж ахуйн нэгж, иргэд хэлж байна. Үүнийг эсэргүүцэж аж ахуйн нэгжүүд нэгдэн “Мөнх ногоон амьдрал” ТББ байгуулжээ.

Энэ талаар “Асрал арго парк” ХХК-ийн захирал, “Мөнх ногоон амьдрал” ТББ-ын тэргүүн Х.Алтанцацралт “Өнгөрөгч пүрэв гарагт Хүнс, хөдөө аж ахуй, хөгжлийн сайд Ч.Улаан бидэнд шаардлагын хариу бичиг ирүүлсэн. Хариунд “Хятадын компани Монголд орж ирээд улсын нийт хэрэгцээний 6.5 хувийг л хангана. Битгий санаа зов. Та нарын борлуулалтад нөлөөлөхгүй. Их үр өгөөжтэй ажил болно” гэж тайлбарласан. Гэхдээ бидний зүгээс төрийн захиргааны байгууллагуудаас гаргаж байгаа шийдвэртэй санал нийлэхгүй байгаа. Тиймээс 20 орчим аж ахуйн нэгж нэгдэн үндэсний хөдөлгөөн байгуулсан.

Төрийн зүгээс уг хүлэмж ашиглалтад орсноор хүнсний өндөр технологитой орж ирнэ. Та нар ногоо тарих арга барилд сурна гэж гэж хэлж байна. Гэхдээ хятадууд ямар технологиор ногоо тарьдгийг дэлхий мэднэ. Бидний зүгээс тус компанид 50 га газарт хүлэмж эрхлэх зөвшөөрөл олгох эсэхийг ард түмний санал асуулгаар явуулах ёстой. Бид хоол хүнс, иргэдээрээ ингэж тоглуулж болохгүй. Хүлэмжийн аж ахуй эрхлэгчдийн зүгээс “Тяньжин фүүдс” компанид ашиглуулах гэж байгаа газрыг иргэддээ өг. Хүлэмж эрхлэгчид уг газрыг өөрсдөө хувааж, нийслэлээр батлуулъя. Хүнсээ өөрсдөө тариалъя. Бидэнд технологиороо хаана ч дутахгүй” гэдгийг тайлбарлаж байна.

Тэгвэл яг үнэндээ Монголын хүлэмж эрхлэгчдэд газар олдох нь бэрх байдаг байна. 50 га газар гэдэг Монголын хүлэмжийн 90 орчим хувийг эзэлдэг.

Түүнчлэн Хэдхэн хоногийн өмнө болсон Хүнсний аюулгүй байдлын чуулга уулзалтын үеэр Ерөнхийлөгч Х.Баттулга “Хүнсний аюулгүй байдал бол Монголын аюулгүй байдал” гэж хэлсэн. Гэтэл тун удахгүй Монголын ард түмэн химийн бордоогоор бордсон хүнс хэрэглэх гэж байна, Ерөнхийлөгч өө. Энэ үндэсний хэмжээнд заналхийлж байгаа аюул биш гэж үү. 

Б.Лхам