ЗХЖШ-ын эрх бүхий албан тушаалтнуудтай холбоотой хэргийг АТГ-ын Мөрдөн шалгах хэлтсийн мөрдөгчид хэрэг бүртгэлтийн хэрэг нээн шалгаж эхэлсэн талаарх мэдээлэл цацагдсан билээ. Тодруулбал, Афганистанд Умард Атлантын гэрээний байгууллагын цэргийн хүчний тэргүүлсэн “Шийдвэртэй дэмжлэг” олон улсын ажиллагаанд манай энхийг сахиулагчид үүрэг гүйцэтгэсээр олон жил болж байгаа. Уг ажиллагаанд АНУ-ын Зэвсэгт хүчинтэй хамтран үүрэг гүйцэтгэдэг энхийг сахиулагчдыг халуун орны хумхаа зэрэг халдварт өвчнөөс сэргийлж, явахаас нь өмнө дархлаажуулж, вакцин хийдэг байна. Зэвсэгт хүчний Хяналт шалгалт, үнэлгээний газраас Монгол Улсын Зэвсэгт хүчний хамгаалалтын ротын есдүгээр ээлжийн бие бүрэлдэхүүнд хийсэн вакцинжуулалтын байдалд төлөвлөгөөт бус шалгалт хийжээ. Шалгалтаар Зэвсэгт хүчний Хяналт шалгалт, үнэлгээний газрынхан албан тушаалаа урвуулсан байж болзошгүй нөхцөл байдал тогтоогдсон гэнэ. Тиймээс АТГ-ынхнаар шалгуулахаар шилжүүлсэн гэх мэдээлэл цацагдан юм.

Тэгвэл энэ талаар Зэвсэгт хүчин, жанжин штабын иргэн, цэргийн харилцааны албанаас тодруулахад "Ийм зүйл болсон гэдэг мэдээлэл ирээгүй. Есдүгээр ротын хувьд эхний ээлж нь өнгөрсөн сард явсан. Удахгүй дараагийн ээлж явахаар бэлтгэлээ хийж байгаа" гэлээ. 

Г.Алимаа