Сүүлийн үед сүрьеэгийн халдварын тархалт их гарч, эцэг эхчүүдийг эмзэглүүлэх асуудлын нэг болоод байна. Тухайлбал, Нийслэлийн ерөнхий боловсролын 15 дугаар сургуулийн 40 орчим хүүхэд уг өвчнөөр өвчилж, 600 орчим хүүхэд халдвар авсан нь тогтоогдоод буй юм. Мөн 97 сургуульд сүрьеэгийн эрт илрүүлгийн шалгалт явуулахад 70 орчим хүүхэд, Төв аймгийн Сүмбэр сумын 200 орчим хүүхэд халдвар авсан мэдээлэл цацагдсан.
Тэгвэл дээрх асуудалтай холбогдуулан 15 дугаар сургуулийн эцэг эхчүүд Эрүүл мэндийн сайдыг огцруулахыг шаардаж жагсаж байна.
Тэдний зүгээс Эрүүл мэндийн сайд салбарын хүн биш учраас гарч буй асуудлыг шийдвэрлэж чадахгүй байна. Өмнө нь байгаагүйгээр их хэмжээний сүрьеэ сурагчдын дунд дэгдлээ.Тиймээс сурагчид ирэх хичээлийн жил эхлэхэд урьдчилан сэргийлэх үзлэгт хамрагдсан байх ёстой. Бэлгэ тэмдэг болсон сайдтай байх ёсгүй гэдгийг хэлж байна.
Иргэн Д.Мэндбаяр “Сүрьеэгээр өвчилсөн хүнийг 6-36 сар тусгаарлах шаардлагатай байдаг юм байна. Хэрэв хүндэрсэн тохиолдолд амь насанд эрсдэлтэй бөгөөд уг өвчнийг бүрэн эмчлэхэд 40-50 орчим сая төргөг зарцуулдаг аж. Өөрөөр хэлбэл хувь хүнд болон эдийн засаг, нийгэмд хор хөнөөлтэй өвчин тул нийгмийн анхааралд орох ёстой” гэлээ.
“Хөгжлийн түлхүүр эмэгтэйчүүд” ТББ-ын тэргүүн Г.Хажидмаа “Эм маш амархан дасал болдог тул эмийн зохисгүй хэрэглээнээс болгоомжилъя. Өөрсдөө дур мэдэн эм хэрэглэлгүй мэргэжлийн байгууллагад заавал хандаарай” гэж уриалав.
Эрүүл мэндийн дэд сайд асан Ж.Амарсанаа “Олон хүүхэд идэвхтэй сүрьеэгийн халдвартай гарлаа. Ингэснээр бусдад халдвар дамжуулах боломжтой гэсэн үг. Өнөөдөр сургуулийн орчинд хүүхэд сурч боловсрох биш өвчин авдаг газар болчихов уу гэж харж байна. Намайг энэ салбарт ажиллаж байх үед сүүлийн 10 жилд энэ талаар тандалт судалгаа хийгдээгүй байсныг эхлүүлсэн. Үүний үр дүн 2016 онд гарсан. Тухайлбал, энэ үед сургуулийн насны хүүхдийн 10 орчим хувь нь далд сүрьеэтэй гэж гарсан. Харамсалтай нь энэ үр дүнг Д.Сарангэрэл сайдад хэлж байсан боловч арга хэмжээ авалгүй явсаар ийм ноцтой түвшинд хүргэсэн.Тиймээс ёс зүйн болон улс төрийн хариуцлага хүлээгээсэй гэж хүсч байна” гэсэн юм.
Б.Лхам
Сэтгэгдэл (6)