Монгол Улсын Засгийн газрын 2016-2020 оны үйл ажиллагааны хөтөлбөрийг хэрэгжүүлэхтэй холбоотой “Мах, сүүний анхдугаар аян”, “Атрын III аян”-ыг хэрэгжүүлэх шийдвэр гарч аянд шаардагдах хөрөнгийг жил бүрийн улсын төсөв, хөрөнгө оруулалтын хөтөлбөрт тусгаж, гадаад улс, олон улсын байгууллагын зээл, тусламжид хамруулах замаар шийдвэрлэж байхыг даалгасны дагуу “Хөдөө аж ахуйн бүтээгдэхүүний үйлдвэрлэлийг дэмжих” төслийг хэрэгжүүлж байна.
Төслийн хүрээнд нийт 24.5 сая ам.долларын хөрөнгөөр газар тариалангийн үйлдвэрлэлд нэн хэрэгцээтэй байгаа 50-165 м.х-тэй трактор 186 ширхэг, хадлангийн зориулалттай 40 иж бүрдэл техник, таримал тэжээл үйлдвэрлэлийн зориулалттай 20 иж бүрдэл техник, үр тариа, тэжээлийн таримлын 50-125 га талбайг услах 130 ширхэг бороожуулагч, төмс, хүнсний ногооны 1-10 га талбайг услах 116 ширхэг дунд болон бага оврын бороожуулагч, жимс, жимсгэнийг услах зориулалт бүхий 90 ширхэг дуслын усалгааны систем болон 110мм-450 мм диаметр бүхий усалгааны хуванцар хоолой тус тус нийлүүлжээ.
Нийлүүлэгдэж байгаа хөдөө аж ахуйн трактор, техник, хүнсний ногооны бага оврын бороожуулагч, тоног төхөөрөмж, усалгааны хоолойг 10 хувийн урьдчилгаа төлбөртэй, найман жилийн хугацаатай, жилийн хоёр хувийн хүүтэй зээлээр олгож байгаа аж.
Харин том, дунд оврын бороожуулагч, дуслын усалгааны системийг урьдчилгаа төлбөргүй 12 жилийн хугацаатай жилийн хоёр хувийн хүүтэй нөхцөлөөр тус тус олгож эхлээд байна. Эдгээр техник тоног төхөөрөмжүүдийг тариаланчдад гардуулан өгөх үйл ажиллагаанд ХХААХҮ-ийн сайд Ч.Улаан, БНХАУ-аас Монгол Улсад суух Онц бөгөөд бүрэн эрхэт элчин сайд Шин Хай Мин нар тэргүүтэй албаныхан гардуулан өгсөн юм.
Төслийг хэрэгжүүлснээр төмс, хүнсний ногоо үйлдвэрлэлийн зүтгэх хүчний техникийн хүчин чадал одоо байгаа төвшнөөс 10 хувиар нэмэгдэж жилдээ 100 мянган тонн хадлан тэжээл, 10 мянган тонн таримал тэжээл бэлтгэх, үр тарианы 9000 га, төмс, хүнсний ногооны 770 га, жимс, жимсгэнийн 150 га талбайг услах техникийн чадамж шинээр бий болно. Уг төслийг хэрэгжүүлснээр үр тариа, төмс, хүнсний ногооны аж ахуй эрхэлдэг иргэн, аж ахуйн нэгжид техникээ шинэчлэх, эрчимжсэн мал аж ахуй, усалгаатай тариаланг хөгжүүлэхэд томоохон дэмжлэг болно гэж салбарынхан үзэж байна. Ингэснээр жилд таван тэрбум төгрөгийн хадлан тэжээл, дөрвөн тэрбум төгрөгийн таримал тэжээл, 1.5 тэрбум төгрөгийн хүнсний ногоо тариалж хураан авах боломжтой болно. Нийт 450 хүний ажлын байр шинээр нэмэгдэх юм.