НҮБ-ын Хөгжлийн хөтөлбөр, Төрийн албаны зөвлөл хамтран хэрэгжүүлж буй “Монгол Улсад мэргэжлийн, иргэн төвтэй төрийн албыг төлөвшүүлэх нь” төслийн Удирдах зөвлөлийн ээлжит хуралдаан Монгол Улс дахь НҮБ-ын байранд тавдугаар сарын 22-ны өдөр боллоо.

 Хуралдаанд Төслийн удирдах зөвлөлийн дарга НҮБХХ-ийн суурин төлөөлөгч Биата Транкманн, Төрийн албаны зөвлөлийн удирдлага, Канадын Элчин сайдын яам, Авлигатай тэмцэх газар, Хүний Эрхийн Үндэсний Комисс, Удирдлагын академи, Монгол Улсын Их Сургууль зэрэг байгууллагын төлөөлөл оролцов.

Өнгөрсөн долоо хоногт УИХ-ын Төрийн байгуулалтын байнгын хорооны хуралдаанаар Төрийн албаны зөвлөлийн 2018 оны тайланг авч хэлэлцсэн билээ. Энэхүү тайлангын хуралдааны үеэр Төрийн албаны зөвлөл болоод Засгийн газарт чиглэл өгсөн юм. Уг чиглэлд Монгол Улсын төрийн албаны шинэтгэлийн дунд хугацааны стратеги”-ийн хэрэгжилтэд шинжилгээ хийж дүгнэж, цаашид 2030 он хүртэл төрийн албаны шинэтгэлийг хэрэгжүүлэх үзэл баримтлал, стратегийн баримт бичиг боловсруулан Улсын Их Хуралд шийдвэрлүүлэх, асуудал багтсан.

Мөн Монгол Улсын сайд, Засгийн газрын хэрэг эрхлэх газрын дарга Л.Оюун-Эрдэнэ Төрийн албаны зөвлөл дээр ажиллах үеэрээ ирээдүйд Монгол Улсын төрийн алба хаана хүрэх, төрийн албыг хэрхэн шинэчлэх, улс төрөөс яавал ангид байлгаж тогтвортой, залгамж чанартай болгох талаарх 5,6-р үеийн шинэтгэлийн бодлогыг цаг алдалгүй боловсруулж эхлэх ёстойг хэлж чиглэл өгсөн юм.

“Монгол Улсад мэргэжлийн, иргэн төвтэй төрийн албыг төлөвшүүлэх нь” төслийн Удирдах зөвлөлийн ээлжит хуралдааны хэлэлцсэн асуудал дээрх чиглэлийн хэрэгжилтийн хангах ажлын эхлэл болж “Төрийн албаны шинэтгэлийн баримт бичиг”, “Засгийн газрын яам, агентлагийн чиг үүргийн шинжилгээ” ажлын удирдамжийн  талаар төслийн баг танилцууллаа.

Төрийн албаны шинэтгэлийн стратегийн баримт бичгийг хэлэлцэж иргэд олон нийт, бүх шатны төрийн байгууллага, төрийн албан хаагчид, эрдэмтэн судлаачдын дунд хэлэлцүүлэг зохион байгуулж саналыг тусган боловсронгуй болгохоор зөвлөлдөв.

Мөн хуралдаанаар төслийн удирдах зөвлөлийн гишүүд 2019 оны ажлын төлөвлөгөөний нэмэлт өөрчлөлтийг хэлэлцэж баталлаа.