Энэ долоо хоногт Тээврийн цагдаагийн алба нийт 1193 дуудлага хүлээн авснаас зам тээврийн ослын шинжтэй 865 дуудлага, мэдээллийг хүлээн авч, шийдвэрлэжээ. Бүртгэгдсэн осол хэргийн улмаас нийслэлд 30 хүн гэмтэж, ноцтой зам тээврийн ослын улмаас нэг, орон нутагт дөрвөн хүний амь нас хохирчээ.

Тухайлбал, энэ сарын 20-ны өдрийн 20:48 цагт Баянзүрх дүүргийн 28 дугаар хорооны нутаг дэвсгэр  Гачууртын замд “Honda Fit”  автомашины жолооч 55 настай М согтууруулах ундаа хэрэглэсэн үедээ тээврийн хэрэгсэл жолоодож “Toyota Prius” маркийн автомашинтай мөргөлдөж, “Toyota Prius” маркийн автомашины зорчигч гурван настай охин С-ийг гэмтээжээ.

Мөн тус өдрийн 22:40 цагт Баянзүрх дүүргийн 14 дүгээр хороо Нарны зам, “Өгөөмөр” захын урд замд марк улсын дугаар тодорхойгүй автомашины жолооч явган зорчигч 57 настай Б-г мөргөж амь насыг нь хохироогоод хэргийн газраас зугтжээ. Хэргийг шуурхай шалгаж, “Hyundai” “Accent Verna” маркийн автомашин үйлдсэн болохыг олж тогтоосон байна.

Түүнчлэн гудамж замд хийж буй хяналт шалгалтын үеэр согтуугаар тээврийн хэрэгсэл жолоодсон 147 жолоочийг илрүүлэн хуулийн дагуу хариуцлага тооцсон бөгөөд жолоодох эрхгүй үедээ согтуугаар тээврийн хэрэгсэл жолоодсон 34 жолоочид баривчлах шийтгэл ногдуулсан байна.