Монгол Улс, БНХАУ-ын хамтын ажиллагааны хүрээнд хятадын технологи бүхий хүлэмжийн аж ахуйг Монголд нутагшуулах үүднээс 50 га газар олгохоор болсон юм. БНХАУ-ын Засгийн газрын хөрөнгө оруулалттай компани болох "Тяньжин Фүүдс" ХХК-т газар олгох тухай асуудал НИТХ-ын Тэргүүлэгчдийн хурлаар хэлэлцэгдэх үед олны анхааралд өртөж, улмаар шүүмжлэл дагуулаад буй.

Учир нь газар олгох чиглэлийг ЗГХЭГ-аас өгсөн бөгөөд ингэхдээ нийслэлийн үржил шим сайтай бүсэд олгохоор тусгасан байдаг. Нийслэлийн удирдлагуудын хэлснээр 50 га газар олгосныхоо хариуд 40 тэрбумын хөрөнгө оруулалт орох ашигтай гэдгийг илэрхийлсэн. Гэвч Монгол Улсад 50 га газарт хүлэмжийн аж ахуй гэдэг нь нийт хүлэмжийн аж ахуй эрхэлдэг газрын 90 хувьтай тэнцэхүйц том газар гэсэн үг юм байна. Тийм учраас Монголын хүлэмжийн аж ахуй эрхлэгчдийн үйл ажиллагаанд төдийгүй Монгол Улсын хүнсний аюулгүй байдалд сөргөөр нөлөөлж болзошгүй уг асуудалд холбогдох албаныхан болон хүлэмж эрхлэгчид эсэргүүцэл зарласан юм.

Тэгвэл уг асуудалд улс төрийн нам, эвсэл болон төрийн бус байгууллагынхан хүч нэмэхээр болжээ. Тодруулбал, энэ сарын 27-нд “Улсаа аврах ард түмний хөдөлгөөн”, “Үнэн ба зөв нам”, “Эрх чөлөөг хэрэгжүүлэгч нам”, “Хувиараа тээвэр эрхлэгчдийн нэгдсэн холбоо”, “Намгүй монгол хөдөлгөөн”, “Экологи зайсан ТББ” нар хамтран шатахууны үнийн хөөрөгдөл болон хятадуудад газар олгохыг эсэргүүцэж, автомашинтай жагсаал зохион байгуулахаар болжээ.

Энэ талаар уг жагсаалыг зохион байгуулагч Б.Цэгмид “Ирэх даваа гариг буюу энэ сарын 27-ны өдрийн 13.00 цагт Төрийн ордны зүүн талд шатахууны үнийн хөөрөгдөл болон асуудлыг эсэргүүцэж, тэмцэл өрнүүлнэ. Бид маш энгийн шаардлага тавьж байгаа.

Хятадуудад газар олгох гэж буй хамтын ажиллагааны гэрээг Засгийн газраас яаралтай цуцал. Хоёрдугаарт, шатахуун, мах өргөн хэрэглээний бараа бүтээгдэхүүний үнийг хязгаарлах, зөв зохистой бодлого явуулах нь засгийн газрын үүрэг. Энэ үүргээ биелүүлэхийг шаардаж байна. Гуравдугаарт, Засгийн газар УИХ-ыг тарахыг шаардаж буй. Энэхүү тэмцэл гурван хоног үргэлжилнэ” гэсэн юм.

Г.Эрдэнэ