Нийгмийг хариуцлагыг түүчээлэгч, өв соёлоо дээдлэгч, эх байгалаа хамгаалагч гэж цаг ямагт рекламддаг өнөөх "Номин холдинг" компанийн Ерөнхийлөгч Ш.Баярсайхан нийслэлд үлдсэн сөөм ногоон байгууламж руу дайраад эхэлж. Дайрах дайрахдаа олны хүчээр далайлгаж, төрийн тамгатай хуудас цаасаар малгай хийсэн байх юм. Ичээсэй.

Монгол Улсад "MCS", "Номин" хоёр шиг аалзны тор шиг сүлжээ хэрсэн групп цөөхөн. Бизнесийн салбар бүрт шургалан орсон тэдний үйл ажиллагааг менежмэнт сайтай гэж магтахаас яалтай. Нийслэлийн хамаг байршил сайтай газарт өөрийн сүлжээ дэлгүүрээ нээж, олны хөл дагуулсан газарт хотхоноо сүндэрлүүлсэн гээд "Номин"-гийн эзэмшлийг тоолоод барахгүй. Тоолж барахгүй их хөрөнгөтэй шигээ гар татуу баячуудын тоонд бас л тэд ордог.

Учир нь Улсын их дэлгүүрт ажиллаж байсан үе үеийн ахмадуудаа хүндэтгэлийн уулзалтад хаа холоос дуудаж ирүүлсэн атлаа аяга хүйтэн будаа, таг нь эвдэрхий тагшаар бэлэг барьсан байдаг. За энэ ч яахав. Өгөх нь хүний өглөг мэдэх зүйл.

Гэвч эх байгалаа хамгаална, ногоон дэлхийг цогцлооно гэсэн утгатай юм ярьж, өдөр бүр зар сурталчилгаагаар бөмбөгддөг эл группийн эзэн Ш.Баярсайхан гэдэг нөхар газар гэхээр л нүдээ ухаж өгөхөөс ч буцдаггүй бололтой. Бололтой ч гэж дээ. Тэгэхээс ч буцахгүй гэдэг нь энэ долоо хоногт өрнөсөн үйл явдал баталлаа. Нийслэл Улаанбаатар хотод ногоон байгууламж гээд нэрлэчихээр газар хэд байдаг билээ. Эдгээрээс "Номин"-чуудын байгуулсан ногоон байгууламж хэд билээ. Гэсэн атлаа нийслэлд үлдсэн сөөмхөн талбайг устгахаар улайрахаасаа ичээсэй билээ. Хүн мөнгөтэй, хөрөнгөтэй байж болно. Гэхдээ ичих булчирхайтай, эх орноо гэх өчүүхэн ч гэсэн сэтгэлтэй байх хэрэгтэй. Үүсгэн байгуулагдсан тэр үеэсээ Эрээний бараанаар монголчуудыг "угжиж" ирсэн "Номин"-гийн гэх тодотголтой баячуудад хандаж хэлэхэд "Мөнгө чухал ч, амьсгалах агаар алхах хөрс минь түүнээс ч илүү чухал юм шүү" гэдгийг хэлчихье.

Асуудлыг тодруулахад, Хан-Уул дүүргийн Засаг дарга Ж.Алдаржавхлан хотын дарга С.Амарсайханд хандсан байна. Тэрбээр өмнөх хотын даргын шийдвэрээр "Номин Холдинг" ХХК-д олгосон 2194 мкв газрын эрхийг цуцалж өгөхийг хүссэн байна.

Учир нь тухайн газар нь ногоон байгууламж бүхий нийтийн эзэмшлийн талбай аж. Тиймээс тухайн газрыг одоогийн нийтийн эзэмшлийн зориулалтаар нь ашиглахыг хүсч буйгаа дүүргийн Засаг дарга илэрхийлж, дэмжлэг хүсжээ. "Номин"-гийнхон нийслэлийн гол гол газруудад улайрдаг үйлдэл ганц энэ биш. Монголын түүх, шашин, соёл урлагийн гайхамшигт өв, дахин давтагдашгүй дурсгал Чойжин ламын сүмийн хашаанд байрлах байшингаа өнөөг хүртэл нураагаагүй.

Уг нь эл газарт хууль бусаар байшин барьсан, тиймээс нураа гэдэг шийдвэрийг гурван шатны шүүхээс гаргасан байдаг. Гэтэл "Номин"-гийн эзэн Ш.Баярсайхан тас гэдийсэн сурагтай. Тэрбээр ганц ийн гэдийгээд зогссонгүй, дээрх ногоон байгууламжийг эзлэн түрэмгийлэхээр улайрахдаа хүртэл ханхар цээжтэй, хав дөрвөлжин залуусаар далбаагаа хийсэн байгаа юм.

Тиймээс "Номин"-гийн босс буюу Удирдах зөвлөлийн дарга, "Номин Холдинг" ХХК-ийн Ерөнхийлөгч Ш.Баярсайхан та ганц ч мод тарьж ургуулаагүй байж нийслэлд үлдсэн цөөн хэдхэн ногоон байгууламжаас гараа татна уу.

Г.Нацаг