Ерөнхий боловсролын сурагчдын дунд сүрьеэгийн халдварын тархалт нэмэгдэж эцэг эхчүүдийн санааг зовоосон асуудлын нэг болоод буй. Тухайлбал, төв аймгийн Сүмбэр сумын сурагчдйн дунд сүрьеэ өвчний халдвар ихэсч байгааг тус аймгийн иргэдийн зүгээс анхааруулж, мэргэжлийн бус салбарын сайдыг өөрийн хүсэлтээр огцрох ёстойг хэлж байна.

Түүнчлэн Төв аймгийн Сүмбэр сумын ерөнхий боловсролын сургууль 300 гаруй сурагчтай. Үүний 200 орчим нь сүрьеэгийн халдвартай эсхүл урьдчилан сэргийлэх шаардлагатай хэмээн тогтмол хугацаанд эм ууж байгаа аж.

Энэ талаар жагсаалд оролцож буй иргэн Б.Бямбажаргал “Хүүхдүүдийг сүрьеэгээр халдварласан гэдгийг аймгаас эмч нар ирж оношилж, мэдсэн. Манайх нэг хүүхэдтэй. Сүрьеэгээс урьдчилан сэргийлэх эм гэрээрээ ууж байгаа” гэсэн юм.

Мөн иргэн Дамбадаржаа “Би 70 нас хүрч байна. Энэ хугацаанд хүүхдүүд олноороо өвчилсөн тохиолдол гарч байгаагүй. Бид бүгдээрээ хүүхэдтэй. Энэ амьсгалын замын өвчнөөр 97 дугаар сургууль хүртэл халдварласан. Удахгүй цэцэрлэгийн хүүхдүүд халдвар авахыг ч үгүйсгэхгүй” гэв. Тиймээс эцэг эх, жагсагчдын зүгээс сайд Д.Сарангэрэлийг ёс зүйтэй байхыг шаардаж ажлаа өгөх хүртэл жагсана гэдгээ мэдэгдэж байна.