Баянзүрх, Чингэлтэй дүүргийн АН-ын 300 гишүүн намаасаа гарахаа өнөөдөр мэдэгдлээ.

Тэдний зүгээс төрийн түшээд МАНАН бүлэглийг устгана гэж ярьж байсан ч дахин шинэ бүлэглэл бий болгож гэж байна. АН хувийн компани шиг боллоо. Хүний үг хэлэх эрхийг шахан боогдуулж, ялгаварлан гадуурхдаг, хөөдөг, намаасаа хасдаг болж хувирчээ. Намын удирдлагууд гэмт хэрэгт холбогдсон, төрийн сэнтийг мөнгөнд донтогсдын хар зах болгож хувиргаж байна. Өнөөдөр АН-ыг толгойлж байгаа ихэнх хүмүүс гэмт хэрэгт холбогдсон нь намын нэр хүндийг унагаж байна. Ийм хүмүүс намын толгойд байгаа цагт намын гишүүн байх ёс зүй алга. Тиймээс бид 30 жил үнэнч явсан намаасаа татгалзаж байна гэв.

Ингээд намын гишүүд гишүүнчлэлээсээ яагаад гарах болсон шалтгаанаа тайлбарлав.

Баянзүрх дүүргийн иргэн н.Хишигдэлгэр “АН хувь хүний үзэл бодлыг авч хэлэлцэхээ больсон. Ялангуяа эмэгтэйчүүдийн хувьд сонгох, сонгогдох эрхээ эдэлж чадахгүй байна. Энэ танай хүн, миний хүн гэж ялгаварлан гадуурхдаг. Намын эмэгтэй гишүүдийн чуулган болох үед Баянзүрх дүүрэгт сонгууль явагдсан мэт эмэгтэй гишүүдийн даргад батлах тамгыг нь гардуулж өгсөн. Үүнээс үүдэн бусад гишүүдийн эрх зөрчигдөж байна. Энэ намд шударга үнэн зүйл байхгүй болсон” тул намаас гарах өргөдлөө өгчээ.

Баянзүрх дүүргийн ахмад гишүүн Н.Янжин “Би 19910 оноос хойш намынхаа идэвхтэн гишүүн болж ирсэн. Өнөөдхөөс эхлэн эх орныхоо язгуур эрх ашгийн өмнө иргэн бид намчирхаж талцан дүр эсгэсэн ардчиллын сүүдэрт 30 жил тогтсон МАНАН-ын нэгдлийн эсрэг нэгдэн зогсох түүхэн хувьсгалыг хийх ёстой” гэсэн юм.

Баянзүрх дүүргийн намын хорооны тэргүүлэгч гишүүн н.Батбаатар “2016 оны дүүргийн намын сонгуульд нэр дэвшин дүүргийн намын төлөөлөгч болсон. Тухайн үед Нүрзэд гэдэг хүнээр намын даргад тавьсан ч АН-д зохион байгуулалт хийж чадаагүй тул өөрийн хүсэлтээр ажлаа өгсөн байдаг. Үүнээс хойш хамт нэр дэвшсэн 56 төлөөлөгчид мэдэгдэлгүй намаас хассан байсан. Миний хувьд нийслэлийн Дүүргийн намын хороонд нэр дэвшихэд гурван сая төгрөгийн хураамж өгсөн. Дүүргийн намын хороонд 1.5 сая төгрөг өгч байсан. Гэтэл би ямар ч арга хэмжээнд оролцож чадалгүй явсаар намаас хасагдсан байна. Уг нь С.Эрдэнэ гэдэг хүнийг намын дарга болгосноор АН доторх фракц алга болох байх гэж найдаж байсан ч тэгсэнгүй. Бидэнд үзэл бодлоо илэрхийлэх эрх ч алга” гэдгийг хэлж байна.

Б.Лхам