Олон Улсын хүүхдийн эрхийг хамгаалах эрхийг тохиолдуулан энэ долоо хоногт хүүхдийн төлөө хийсэн сайн үйлстэнүүдийг онцлон хүргэж байна.

Өнгөрсөн тавдугаар сарын 28-ны өдөр буюу энэ мягмар гарагт Баянзүрх дүүргийн 9, 17, 24 дүгээр хороонд орчин үеийн багаж, тоног төхөөрөмж бүхий 50 орны хүчин чадалтай хүүхдийн эмнэлэг шинээр ашиглалтад орсон сайхан мэдээтэй долоо хоногийг угтлаа. Уг эмнэлэг нь  нийт гурван давхар, 800м2 талбайтай бөгөөд шүд, дүрс оношилгооны кабинет, хүүхдийн хэвтэн эмчлүүлэх тасаг, хүлээн авах хэсэгтэй. БНХАУ-ын “Энхтайван хөгжлийн сан”-гийн дэмжлэгээр баригдсан тус эмнэлэг ашиглалтад орсноор 0-16 насны 13.345 хүүхдэд эмнэлгийн тусламж, үйлчилгээ үзүүлэх боломжтой болж байна.

Мөн Энержи Ресурс компани нийгмийн сайн сайхны хүрээнд Монголын Улаан загалмайн Нийгэмлэгтэй хамтран "Бяцхан зүрх" төслийг хэрэгжүүлж байна. Энэ хүрээнд Энержи Ресурс компани төрөлхийн зүрхний гажигтай 40 хүүхдэд амьдрал бэлэглэхээр 920 сая төгрөгийг тэдний эмчилгээний зардалд хандивлалаа. Тус байгууллагын зүгээс хүүхдүүддээ бодит бэлэг барихаар ийн шийджээ. Ингэхдээ амьдралын боломж бололцоо тааруу байгаа гэр бүлд туслахаар болжээ. Манай улсын хувьд зүрхний төрөлхийн гажиг сүүлийн үед ихсэж байгаа бөгөөд 100 хүүхэд тутмын 4-5 нь зүрхний гажигтай аж. Уг нь бол ураг хоёр сартай болох үеэс зүрхний гажгийг оношлох бүрэн боломжтой хэдий ч манайхан эрүүл мэндийн боловсрол дутмагаас болоод гажигтай төрөх тохиолдол ийм өндөр юм байна. Тиймээс хамгийн гол нь эцэг эхчүүд жирэмслэхээсээ өмнө биеэ үзүүлж, шаардлагатай арга хэмжээг авч байх шаардлагатайг мэргэжилтнүүд зөвлөж байна.

Түүнчлэн энэ сараас эхлэн хүсэлт гаргасан хүүхэд бүр ямар нэгэн шалгуургүйгээр хүүхдийн мөнгө авдаг боллоо. Энэ оны хувьд хүүхдийн мөнгөнд 218 тэрбум төгрөг төсөвлөжээ. Хөдөлмөр, халамж үйлчилгээний газрын мэдээллийн санд одоогийн байдлаар 980 мянган хүүхэд хүүхдийн мөнгө авах хүсэлтээ ирүүлсэн байна. Тиймээс Засгийн газраас нэмэлт санхүүжилтийн эх үүсвэрийг шийдсэн тул  өнөөдрөөс эхлэн хүүхдийн мөнгийг олгож эхлэх юм байна. Харин хүсэлт гаргаж амжаагүй байгаа бол харьяа аймаг, дүүргийнхээ хөдөлмөр халамж үйлчилгээний байгууллагад хандах боломжтой бөгөөд шинээр өгч байгаа хүүхдүүдэд нөхөн олгох боломжгүй гэдгийг холбогдох мэргэжилтнүүдээс тайлбарлалаа.

Дорнод аймгийн Гэр бүл, хүүхэд залуучууд хөгжлийн газраас өөрийн байгууллагын алба хаагчдад хүүхдийнх нь төрсөн өдрөөр цалинтай чөлөө өгөхөөр шийдвэрлэжээ. Энэ талаар тус газрын дарга Э.Жавхлан “Хүн үр хүүхэд, гэр бүлдээ зарцуулах гэж мөнгөний төлөө зүтгэж ажил хийдэг. Өнөөдөр хүүхэд, мөнгө хоёрын байр нь солигдчихож. Байр нь солигдчихсон болохоор гэр бүлдээ зарцуулж буй цаг хугацаа нь хомсдож, гэр бүлийн уур амьсгал хөндийрч эхэлж байгаа юм. Ажил ажил гэж явсаар байгаад хүүхдийнхээ хүүхэд насыг харахгүй өнгөрөөчих вий дээ, хүүхэддээ өөрийнхөө залуу насыг харуулалгүй өнгөрүүлчих вий дээ гэж боддог. Хүүхэддээ цаг гаргадаг эцэг эхчүүд л хүүхэдтэйгээ ойлголцдог, шийдвэр гаргахад нь тусалж дэмжиж, ойр дотно байдаг. Тиймээс уг шийдвэрийг гаргасан" гэж ярьж байлаа. Энэ шийдвэрийг ч бусад албан байгууллагууд ажилтнаа бодож гаргаасай гэж хүссэн юм.

Ажлын их ачааллаас үүдэн ялангуяа, нийслэлийн иргэдийн хувьд замын хөдөлгөөний түгжрэл зэргээс шалтгаалан эцэг эхчүүд хүүхдүүддээ цаг зав гаргах нь хомс байдаг. Олон байгууллага, аж ахуйн нэгж тус байгууллагаас үлгэр дуурайл авч хэрэгжүүлээсэй гэж хүсч байна. Учир нь хүүхэд аливаа баярыг ээж аавтайгаа өнгөрүүлж, тэдний хайр халамжийг өгүүлж байдаг юм шүү. 

Ингээд энэ долоо хоногт Дорнодын Гэр бүл, хүүхэд залуучууд хөгжлийн газрынхан бусдыгаа түүчээлж, хүүхдийн шинэ эмнэлэгтэй, бяцхан зүрхэнд амьдрал бэлэглэсэн долоо хоног болж өнгөрлөө.