Олон улсын “Талын салхи-2019” мото наадмын нээлт энэ сарын 8-нд Сүхбаатарын талбайд болно. Тав дахь жилдээ зохион байгуулж буй энэхүү мото наадамд чоппер моторын дуунд нэгдсэн 800 төмөр хүлэгтэн оролцох ажээ. Мото наадмын нээлтийн ёслолын дараа төмөр хүлэгтнүүдийн цуваа “Чингис хааны морьт хөшөө цогцолбор” тийш хөдлөх юм байна.

Ерөнхий сайд У.Хүрэлсүх мотоциклийн спортын хорхойтон бөгөөд энэ удаагийн наадмыг нээж, тус парадад нэгдэн хамт хөдлөх юм байна. Ази тивдээ томоохон мото наадам болгон өргөжүүлэх зорилготой тус наадам нь тусгай сонирхлын аялал жуулчлалыг хөгжүүлэн, Монгол Улсыг олон улсад сурталчлах, жуулчдыг татах их ач холбогдолтой юм.

Ерөнхий сайдын хувьд Монголын Harley  Davidson сонирхогчдын холбооны тэргүүнээр ажилладаг. Энэ тухайгаа тэрбээр “Харли Дэвидсон өөрөө эрх чөлөө, эрч хүчний бэлгэдэл юм. Манай улсад Солийн Данзан анхны Харли Дэвидсоныг унаж байсан. Тухайн үед ЗХУ-д хүртэл Харли орж ирээгүй байсан түүхтэй. Миний унадаг Харли Дэвидсон бол Патбой гээд хүмүүс Терминатор киноны нэгдүгэр ангид гардагаар нь мэддэг. Моторын багтаамж нь 1800.  Эксел машиных бол 1300-тай байдаг. Тэгэхээр хэчнээн чадалтай нь харагдаж байгаа биз” хэмээн ярьж байсан удаатай.

С.Сүлд