Мөнхийн залуу тодотголтой загвар өмсөгч Э.Одгэрэл загварын тайзнаа 1988 онд анх хөл тавьснаас хойш хамгийн халуухан, үзүүштэй мэдээж мэргэжлийн үнэ цэнэтэй загвар өмсөгч хэвээр явж ирлээ. Тайзан дээр гарсан хугацаа, зураг авалтын тоо нь Монголдоо төдийгүй олон улсын хэмжээнд ч гайхагдахаар болсон байхыг үгүйсгэхгүй.

Яагаад гэвэл хүссэн хүн бүр түүн шиг удаан тайзан дээр амьдарч, хүлээн зөвшөөрөгдөж чаддаггүй. Гэхдээ нэг сонин зүйл байдаг нь загварын ертөнцөд ингэж удаан оршсон тогтносон атлаа хатагтай Э.Одгэрэл хэзээ ч дотуур хувцасны зураг авалтад орж байгаагүй ажээ. Тэгвэл 50 гартлаа нүцгэлээгүй Э.Одгэрэлийг саяхан нэгэн брэнд нүцгэлүүлж чадсан нь багагүй дуулиан тариад байна.

Загварын ертөнцийн домог болсон эмэгтэйн гоо биеийг тодотгох дотуур хувцасны брэнд, зураг авалтын ажил гэвэл түүнтэй дүйцэх хэмжээний том байж таарна. Тэгвэл үзэсгэлэнт Э.Одгэрэл дэлхийн алдартай брэнд “Инканто”-гийн монгол нүүр царай болж, үзэсгэлэнт биеэ ил гаргасан байна. Загварын орон Италид анх 1990-ээд оны дундуур мэндэлсэн тус брэнд өдгөө дэлхийн өнцөг булан бүрт үүдээ нээж 280 гаруй салбар дэлгүүртэй болсон аж. Одоогоос жил гаруйн өмнө Монголд орж ирж, Улаанбаатарын Гэрэлт гудамжинд дэлхийн стандартаар, Италиас авчирсан тавилга хэрэгслүүдтэй тансаг дэлгүүр нээгдсэнээс хойш өөрийгөө хүндэтгэдэг эмэгтэйчүүд гол үйлчлүүлэгчид нь болсон байдаг. Хамгийн чанартай, хамгийн тансаг материалаар биед хамгийн тав тухтай дотуур хувцас үйлдвэрлэдэг “Инканто” мөнхийн залуу гоо хатагтайг 52 насанд нь нүцгэлж чаджээ. Энэхүү зураг авалт Боинг 737 онгоцонд хийгдсэн бөгөөд загварын ертөнцийн хүлээн зөвшөөрөгдсөн эмэгтэй, дэлхийн алдартай брэнд, Монголын хамгийн том онгоц гээд төгс зохицол болж харагдаж байна.

Угаасаа энэ брэнд анхнаасаа гучаас дээш насны эмэгтэйчүүдэд зориулан гарч ирсэн бөгөөд эмэгтэй хүн энэ насандаа оюун санааны хийгээд эдийн засгийн хувьд хүчтэй болсон байдаг тул өөрийнхөө гоо сайхан, эрүүл мэндэд хамгийн сайныг авч хэрэглэнэ гэдгийг тооцоолж гаргасан брэнд аж. Агаар нэвтрүүлдэг маш сайн материал, тансаг бас бат бөх тор, сваровски шигтгээ нь “Инканто” брэндийг илтгэдэг. Загвар өмсөгч Э.Одгэрэл энэ брэндийг орж ирсэн цагаас нь үнэнч хэрэглэгч нь байсан бөгөөд энэ удаад албан ёсоор нүүр царай нь болжээ.