Манай улс энэ сарын эхээр 21.6 сая төл бойжуулжээ. Ингэснээр нийт 85 сая гаруй толгой малтай болоод байна.
Өнгөрсөн жил 18 орчим сая толгой малыг эдийн засгийн эргэлтэд оруулж малын тоо толгойн өсөлтийг 66.5 сая толгойд барьсан. Тэгвэл энэ намар 20 сая толгой малыг эдийн засгийн эргэлтэд оруулахаар төлөвлөжээ.
Учир нь малын тооны хэт өсч бэлчээрийн даац хэтрэн, хөдөөгийн хүн ам, мал аж ахуйн усан хангамж хүрэлцээгүй болжээ. Түүнчлэн үлийн цагаан оготны тархалт нэмэгдэж, отрын бүс нутгийн даац бага, ган, зудын давтамж нэмэгдсэн зэрэг шалтгааны улмаас малын тоо толгойг бэлчээрийн даацад тохируулан зохицуулах шаардлагатай байгаа аж.
Тиймээс жилд 20 саяас доошгүй толгой малыг эдийн засгийн эргэлтэд оруулж, малчдыг орлогожуулах, сүргийн бүтцийг зохистой болгох, малын зүй бус хорогдлыг багасгах, цаашид нийт малд эзлэх үржлийн малын тоог өсгөх бодлого барьж ажиллаж байна.
Малын тоо толгой өсөж, зайлшгүй зохицуулалт хийх шаардлагатай болсонтой холбогдуулан Монгол Улсын Засгийн газраас 2017 онд “Малын гоц халдварт өвчингүй, хорио цээрийн тусгаарлагдсан бүс байгуулахтай холбогдуулан авах зарим арга хэмжээний тухай” 284, “Мал махны экспортыг нэмэгдүүлэх талаар авах зарим арга хэмжээний тухай” 318 дугаар тогтоол гарсан.
Мөн 318 дугаар тогтоолын төслийн танилцуулгад малын өвчин гараагүй, төвийн бүсийн 14 аймгийн 190 сумаас 2017 онд бэлтгэлийн насны эр хонь 713.6 мянган толгой буюу 14.1 мянган тонн хонины мах, бэлтгэлийн насны эр ямаа 907.3 мянган толгой буюу 14.5 мянган тонн ямааны мах, нийтдээ 1,621.0 мянган толгой буюу 28.6 мянган тонн махыг амьд хэлбэрээр экспортлох судалгаа гаргаж Засгийн газрын тогтоолын төсөл боловсруулсан байна.
Түүнчлэн БНХАУ-ын Манжуур хотод 2017 оны долдугаар сарын 20-ны өдөр болсон Монгол Улсын болон БНХАУ-ын хүнсний бүтээгдэхүүний экспорт, импортын аюулгүй байдлын газрын V уулзалтын шийдвэрт Монголын талын хүсэлтээр Монгол Улсаас БНХАУ-д мал, мах экспортлох боомтын тоог нэмэгдүүлэх шийдвэрийг гаргасан.
Дээрх тогтоол, шийдвэрийн хэрэгжилтийг хангах хүрээнд Манай улсад анх удаа Дорноговь аймгийн Замын-Үүд суманд малыг үйлдвэрийн аргаар нядлан гадаад, дотоодын зах зээлд мах, махан бүтээгдэхүүн нийлүүлэх “Малын гоц халдварт өвчингүй эрүүл хорио цээрийн бүс байгуулах” төслийг эхлүүлсэн байна. Уг төслийн хүрээнд малын хөлөөр нь экспортлох ажил хийгдээгүй байна.