“Зохион бүтээгчдийн нэгдсэн холбоо”-оос Эрээн хотоос хашаа зөөж буй шар хашааны талаар мэдээлэл хийж байна.

4000 метр үргэлжлэх шар хашаа БНХАУ-аас 700 сая төгрөгөөр орж ирж байгаа аж. Үүний цаана маш олон хуулийн заалт зөрчигдөж байна. Тиймээс хотын менежер Т.Гантөмөрийг АТГ-д өгч шалгуулна гэв. Түүнчлэн УИХ-ын дарга, Ерөнхий сайд нарт нийтийн сонсгол хийх талаар албан бичиг хүргүүлэхээр болжээ.

Энэ талаар зохион бүтээгч н.Цэрэндаш “Улс орныхоо эдийн засгийг хөгжүүлэх, үндэсний үйлдвэрлэлээ дэмжихэд зориулж олон хууль тогтоомж гарсан байдаг. Гэвч УИХ-аас батлан гаргасан хууль хэрэгжихгүй байна. Шар хашааг урд хөршөөс оруулж ирсэн нь маш олон хууль тогтоомжтой харшилдаж байна. Тухайлбал, “Мянганы хөгжилд суурилсан үндэсний цогц бодлого-2016”, “Төрөөс өндөр технологийн аж үйлдвэрийн талаар баримтлах бодлого-2010”, “Монгол Улсын Үндэсний аюулгүй байдлын үзэл баримтлал-2012”, “Ногоон хөгжлийн бодлого-2014”, “Төрөөс аж үйлдвэрийн талаар баримтлах бодлого-2016”, “Монгол Улсын тогтвортой хөгжлийн үзэл баримтлал 2016-2030”, “Монгол Улсын Засгийн газрын 2016-2020 оны мөрийн хөтөлбөр”-т ажлын байр бий болгоно, үндэсний үйлдвэрлэлээ дэмжинэ гэж тусгасан.

Мөн энэ оны нэгдүгээр сарын 30-ны өдөр Тендерийн тухай хуулийг шинэчлэн баталсан. Үүнд, үндэсний үйлдвэрлэгчдээ дэмжи талаар зааж өгсөн. Тухайлбал, энэ хуулийн 10.1-д “Чанар, стандартын шаардлага хангасан бараа, дотоодын үйлдвэрлэлээр хангах боломжтой тохиолдолд тендер шалгаруулалтад гадаадын бараа нийлүүлэгчдийг оролцуулахыг хориглоно” гэж заасан. Уг хашааг захын үйлдвэрлэгчид хийж чадна. Тус хуулийн 13.3-д “Стандарт болон стандарт бус төмөр хийц, түүхий эд, хашаа, товолсон шурга, төмөр эсвэл ган утсаар нэхсэн туузан, эрчилсэн, сараажин хашаа, барилгын тулаас төмрийг Монголдоо үйлдвэрлэнэ” гээд нэр заагаад өгчихсөн байхад гаднаас оруулаад ирж байгааг нь гайхаж байна” гэсэн юм.

“Монголын хог хаягдлыг дахин боловсруулах үндэсний холбоо”-ноос гишүүн байгууллагууддаа судалгаа хийжээ. Мөн дээрх холбооноос 200 сая төгрөгөөр яг ижил хийц, загвартай чанарын өндөр түвшинд хийх боломжтой байсан гэлээ.

Б.Лхам