Орон нутгийн замд гарч байгаа зам тээврийн осол болон авч хэрэгжүүлж байгаа арга хэмжээний талаар Цагдаагийн ерөнхий газраас мэдээлэл хийлээ.

Орон нутгийн замд үйлдэгдэж байгаа ослын талаар Тээврийн цагдаагийн албаны дарга, цагдаагийн хурандаа Д.Амарсайхан “Засгийн газрын 128 дугаар тогтоолоор Ерөнхий сайдаар ахлуулсан замын хөдөлгөөний аюулгүй байдлын үндэсний зөвлөлийг байгуулсан. Улмаар Засгийн газрын 163 дугаар тогтоолоор Замын хөдөлгөөний  аюулгүй байдлыг хангах үндэсний хөтөлбөр батлагдсан. Уг хөтөлбөрөөр замын хөдөлгөөний авулгүй байдлыг хангах, зам тээврийн ослыг бууруулах тодорхой зорилт тавьсан.

Дээрх зорилтын дагуу аялал зугаалгын цаг эхэлсэнтэй холбогдуулан “Орон нутгийн замын хяналт, хөдөлгөөний соёл 2019” нэгдсэн арга хэмжээг эхлүүлж байна. Орон нутгийн замд үйлдэгдэж байга осол хэргийг бууруулах, урьдчилан сэргийлэх, хөдөлгөөнд оролцогчдын соёл, сахилга хариуцлагыг сайжруулах зорилгоор уг арга хэмжээг тогтмол явуулдаг юм.

Судалгаагаар орон нутгийн замд гарч буй осол хэргийн 70 орчим хувь нь зургадугаар сараас есдүгээр сарын хооронд гардаг аж. Учир нь хөдөлгөөнт оролцогчдын 70-80 орчим хувь нь 50-60 км цагийн хурд хэтрүүлж явдаг байна. Түүнчлэн хүүхэд буруу тээвэрлэх, гэрлээ шилжүүлэхгүй байх, түр зогсох хөдөлгөөний буруу хийдэг, согтууруулах ундаа хэрэглэдэг, бүрэн бус тээврийн хэрэгслээс үүдэн осол их гардаг. Тиймээс энэ арга хэмжээг хэрэгжүүлэх зайлшгүй шаардлагатай бөгөөд уг ажилд иргэдийг цагдаагийн байгууллагатай хамтран ажиллахыг уриалж байна. Энэ жилийн хувьд мөн хөдөлгөөнт хэлбэрээр хяналт, шалгалтыг зохион байгуулна” гэлээ.

Мөн цагдаагийн байгууллагаас анхааруулсаар байтал иргэдийн анхаарал болгоомжгүй үйлдлээс үүдэн зарим аймгуудад ослын тоо нэмэгджээ. Тиймээс  орон нутгийн зам дахь постуудыг 24 цагаар ажиллуулахаар болсон байна.

Б.Лхам