Энэ долоо хоногт болсон онцлох үйл явдлаас хүргэж байна.
Нийслэлийн Засаг даргын захирамжаар 4850 ширхэг шар хашлагыг 700 орчим сая төгрөгөөр БНХАУ-аас импортолсон асуудал энэ долоо хоногт маргаан дэгдээгээд байна. Энэ талаар Нийслэлийн авто замын хөгжлийн газрын дарга Ж.Тогтохбаяр "Шар хайсан хашлагыг хотын Ерөнхий менежер захиалж, хариуцаж, Тээврийн цагдаатай зөвлөлдөж шаардлагатай газруудад байрлуулсан. Өмнө нь байсан хуванцар шар, улаан хайсан хашлагуудыг ч мөн нийслэлийн Засаг даргын Тамгын газраас шийдэж, Улаанбаатар зам засвар арчлалтын газраар байршуулж байсан. Энэ удаад байршуулсан хашлага нь өмнөхөөсөө илүү чанартай, стандартад нийцсэн гэж хотын Ерөнхий менежер хэлсэн" гэсэн юм. Шар хашлага хятадаас ингэж импортолсон нь УИХ-аас гаргасан олон хууль тогтоомжийг зөрчиж байна гэж “Зохион бүтээгчдийн нэгдсэн холбоо”-оос өчигдөр мэдээлж, уг асуудлаар хотын менежер Т.Гантөмөрийг АТГ-д шалгуулахаар болсон талаар мэдэгдсэн юм. Тухайлбал, Тендерийн тухай хуулийн 13.3-д “Стандарт болон стандарт бус төмөр хийц, түүхий эд, хашаа, товолсон шурга, төмөр эсвэл ган утсаар нэхсэн туузан, эрчилсэн, сараажин хашаа, барилгын тулаас төмрийг Монголдоо үйлдвэрлэнэ” гэж заажээ. Төрийн эрх барих дээд байгууллагаас үндэсний үйлдвэрлэлээ дэмжих талаар орон хууль, тогтоол санаачилсан ч гүйцэтгэх байгууллагын албан тушаалтнууд хэрэгжүүлэхгүй байгааг онцолсон. Тэдний хэлж байгаагаар 700 сая төгрөгөөр импортолсон уг хашлагыг дотоодын үйлдвэрүүд гурав дахин бага үнээр үйлдвэрлэх боломжтой байсан. Тиймээс зарим албан тушаалтнуудыг ийнхүү шалгуулахаар болжээ.
Түүнчлэн эрүүдэн шүүх асуудал аль ч үед байсан гэдгийг хуулийн мэргэжилтнүүд болон эрүүдэн шүүхийн эсрэг чиглэлийн үйл ажиллагаа явуулдаг байгууллагын төлөөллүүд хэлж байгаа. Энэ нь хүнийг бие болоод сэтгэл санааны асар их дарамтад оруулдагын нэг жишээ бол Орхон аймгийн иргэн Д.Ням-Очир юм. Тэрбээр цэрэг татлага руу яваад 21 хоног ор сураггүй алга болсон бөгөөд уг хугацааны дараа түүнийг хулгайн болон хүн амины хэрэгт холбогдсон талаар ар гэрт мэдэгдсэн байдаг. Тухайн үед Д.Ням-Очир Орхон аймагт цэрэг татлага дээр байсан бөгөөд түүнийг буруутгасан хэрэг Улаанбаатар хотод үйлдэгдсэн байжээ. Уг хэргийн улмаас Д.Ням-Очирыг 330 хоног цагдан хорьсон бөгөөд ингэхдээ уг хэргийг хүлээлгэх гэж янз бүрээр эрүүдэн шүүсэн талаар түүний ээж манай сайтад өгсөн ярилцлагадаа хэлсэн юм. Д.Ням-Очирын ээжийг Д.Ойсайхан гэдэг бөгөөд тэрбээр хүүгийнхээ төлөө хүрч чадах бүхий л байгууллагад хандаж, итгэлээ алдалгүй зүтгэж яваа нэгэн. Учир нь түүний хүү цагдан хоригдсон 330 хоногийн хугацаанд сэтгэл мэдрэлд нь 70 хувийн өөрчлөлт орсон байна. Өөрөөр хэлбэл, Монголд эрүүдэн шүүлт гэдэг нийгмийн хар толбо ямар хэмжээнд явааг илтгэсэн хэрэг юм.
Үүнээс гадна тэмбүү өвчний тархалт ихсэж, “дайн” карла хэмжээнд хүрлээ. Тухайлбал, Эрүүл мэндийн яамнаас тэмбүү өвчнийг устгахаар “Улаан тариа-II” аянг эхлүүлэв. Жилд 50 орчим хүүхэд төрөлхийн тэмбүүтэй төрж байна гэсэн судалгаа бий бөгөөд халдварт өвчний 35-40 хувийг тэмбүү эзэлж байна. Түүнчлэн энэ оны эхний дөрвөн сарын байдлаар улсын хэмжээнд тэмбүү өвчний 1922 тохиолдол бүртгэгдсэнээс 992 тохиолдол нь Улаанбаатар хотод бүртгэгджээ. Мөн он гарснаас хойш дөрөвхөн сарын хугацаанд төрөлхийн тэмбүүгийн 49 тохиолдол бүртгэгдсэнээс 11 нярай нас барж, 14 нь амьгүй төрсөн харамсалтай мэдээ бий юм. Өөрөөр хэлбэл, энэ өвчин нь аль хэдийн үндэсний аюулын түвшинд хүрсний дохио бөгөөд томчуудын буруутай үйлдлээс болж бяцхан үрс энэлэл шаналалтай хорвоод мэндэлж, бас орхиж байна.
Энэ сард шатахууны хилийн үнэ өнгөрсөн сараас тонн тутамд 52 ам.доллар, дизель түлшийн хувьд 1 ам.доллараар тус тус буурчээ. Энэ хүрээнд Шатахууны үнийн зөвлөлөөс аж ахуйн нэгжүүдийг шатахууны үнийг буулгах шийдвэр гаргасан ч зарим аж ахуйн нэгжүүд одоог хүртэл жижиглэнгийн үнээ буулгаагүй байна. Тиймээс ШӨХТГ-аас тус аж ахуйн нэгжүүдийг ирэх даваа гараг гэхэд шатахууны үнээ буулгахгүй бол үйл ажиллагаа эрхлэх тусгай зөвшөөрлийг цуцлуулах хүсэлтийг Уул уурхай, хүнд үйлдвэрийн яаманд хүргүүлнэ гэдгээ мэдэгдлээ.
Дээрхээс гадна Монголын Оюун Ухааны Академи болон академийн харьяа "Ивээлийн найзууд" цэцэрлэгийн дөрвөн настай бяцхан тамирчин Х.Ивээл "Amazing People" шоу нэвтрүүлэгт уригдаж, үр тариа 5000 га, төмсний тариалсан талбай 1.3 мянган га-гаар нэмэгдсэн долоо хоног болж өнгөрлөө.
Б.Лхам
Сэтгэгдэл (6)