Хэрэв та автобусаар зорчдог бол нийтийн тээврийн талаарх тоон мэдээлэлтэй сурталчилгааны зурагт хуудсыг харсан байх. Өдөрт хэдэн автобус үйлчилгээнд явдаг, хэр их орлого олдог, хэчнээн зорчигч зорчсон гэх мэт мэдээллүүд бий. Тэдгээрээс зарим тоог нь сонирхуулъя.  Өнгөрсөн онд нийслэлд нийтийн тээврийн үйлчилгээний салбарт өдөрт 895 тээврийн хэрэгсэл шугаманд явж, нэг өдөрт дунджаар 188.2 сая төгрөгийн орлоготой ажилласан байна. Сарын 28 хоногоор бодвол 5.3 тэрбум төгрөг олдог гэсэн үг. Чамлахааргүй тоо сонсогдож байгаа биз. Энэ тоог дурдсаны учир нь манай хотын удирдлага, дээд албан тушаалтнууд нийслэлийн иргэдийг замын түгжрэлээс зайлсхийж нийтийн тээврээр зорчихыг уриалдаг. Гэтэл нөгөө хэдэн автобус нь халтар, бохир, цэвэрлэгээ муутайгаас гадна өвөл цонх нь юу ч харагдахгүй цантаж, хөлдөөгч шиг болно. Харин зун нь агааржуулалт ажиллуулах талаар санаад ч хэрэггүй. Салхигүй л бол ваакум орчинд, хөлсөө урсгаж  зорчино. Заримдаа төв цэвэрлэх байгууламж автобусанд үнэртэж байгаа мэт бохир, тавгүй сэтгэгдэл төрүүлэхээр.

Харин дээрх хэмжээний орлого олдог бол автобус баазуудыг автобусаа шинэчлэхийг, хөгжлийн бэрхшээлтэй иргэн зорчих боломжтой стандарт хангасан, цэвэр, тохь тухтай зорчих орчин бий болгохыг холбогдох газар шаардах ёстой. Түүний дараа иргэдээ нийтийн тээврээр зорчихыг уриалбал сая иргэд нэгийг бодно.

Нөгөө талаас иргэд заавал карт уншуулах. Дээрх тоон мэдээлэлд хоёр сая орчим зөрчил илрүүлсний 46 хувь нь бэлэн мөнгө төлж явсан байна. Өөрөөр хэлбэл, шууд жолоочийн халаасанд орсон гэсэн үг. Харин 21 хувь нь хөлс төлөөгүй явсан. Гаднын орнуудад нийтийн тээврийн тасалбар шалгах ч үгүй иргэд нь өглөө гэрээсээ гарахдаа тэр өдрийнхөө, эсвэл зорчих үедээ тасалбараа аваад, эсвэл ухаалаг цахим картаар төлбөрөө төлөөд зорчдог. Хаа нэг шалгалтын хүмүүс гэнэтийн байдлаар иргэдийн зорчих тасалбар, төлбөр төлснийг нь шалгаад хэрэв төлөөгүй бол хэд дахин үржиж газар дээр нь торгодог. Энэ мэт энгийн тогтолцоог бий болгохын тулд эхлээд үйлчилгээгээ сайжруул тэгээд иргэдээс шаардах гэсэн харилцаа л хэрэгтэй байна.

Нийтийн тээврийн үйлчилгээний газраас 2019 оныг иргэдийн оролцоотой үйлчилгээний чанарыг сайжруулах жил болгон зарласан. Тэгвэл энэ хүрээнд та бүгд үйлчилгээгээ сайжруулаад эргээд иргэдээс төлбөрөө заавал картаар төлөхийг шаард.