Мэргэжлийн хяналтын газраас дээд боловсролын болон мэргэжлийн боловсрол, сургалтын байгууллагуудын үйл ажиллагаанд хяналт шалгалт хийсэн байна.

Шалгалтын хугацаанд нийт 381 зөрчил ирсэн байна. Тодруулбал,  их, дээд сургуулиудын 26 хувь нь зориулалтын бус байранд үйл ажиллагаа явуулж байсан бол лаборатори, кабинетууд нь дээд боловсролын стандарт, сургалтын хөтөлбөрт заасны дагуу тоног төхөөрөмжөөр тоноглогдоогүй, стандартад тавигдах шаардлагыг бүрэн хангаагүй байна. Түүнчлэн номын сан, уншлагын танхимгүй, уншлагын танхим дахь суудлын тоо оюутан суралцагчдад хүрэлцээгүй зэрэг зөрчил илэрчээ. Тухайлбал, “Шинэ монгол” технологийн коллеж нь Боловсролын магадлан итгэмжлэл хийх эрх бүхий байгууллагаар байгууллагын болон хөтөлбөрийн магадлан итгэмжлэл хийлгээгүй, “Глобал удирдагч”, “Тэнгэр”, “Гурван-Эрдэнэ” багшийн, Радио телевиз, медиа урлагийн, “Улаанбаатар эрдэм” их сургуулиудад үндсэн багшийн эзлэх хувь хангалтгүй зэрэг зөрчлүүдийг илрүүлсэн байна.

Түүнчлэн “Анима”, “Хангай”, “Эко монгол” МСҮТ нь БСШУСЯ-наас олгосон тусгай зөвшөөрлөөр, ХНХЯ-наас олгосон тусгай зөвшөөрлийн хавсралтаар  сургалтын үйл ажиллагаа тус тус эрхэлж байна. МСҮТ-ийн сургалтын үйл ажиллагаа эрхлэхээр бол ХНХЯ олгох ёстой. Харин “Анима”,  “Барилгын бүтээцийн үйлдвэрлэл”, “ТST” МСҮТ нь тусгай зөвшөөрөл дэх хаяг байршилд үйл ажиллагаа явуулаагүй, үйл ажиллагаа эрхлэх хаяг, байршилд өөрчлөлт оруулах хүсэлтийг Мэргэжлийн боловсрол, сургалтын бодлогын хэрэгжилтийг зохицуулах газарт одоог хүртэл хүргүүлээгүй байжээ. “Хангай” МСҮТ-ийн тусгай зөвшөөрөлд “зочид буудал, зоогийн газрын үйлчилгээний ажилтан” мэргэжлээр сургалт явуулах зөвшөөрөлгүй байхад ХНХ-ын сайдын 2018 оны A/129 дүгээр тушаалаар тухайн мэргэжлээр элсэлтийн хяналтын тоог баталсан байна.

Их, дээд сургуулиудын 5 буюу 50% нь зориулалтын бус байранд  хичээл сургалтын үйл ажиллагаа явуулж байна.

Тухайлбал:  “Барилгын бүтээцийн үйлдвэрлэл” МСҮТ-ийн хичээлийн байранд “Булган зул” хүүхдийн цэцэрлэг үйл ажиллагаа явуулсан, “Сам Юүк” МСҮТ нь Долоо дахь өдрийн Адвентист Сүмийн Хойд Ази Номхон Далайн Бүсийн чуулганы эзэмшлийн байранд түрээслэн хичээл сургалтын үйл ажиллагаа явуулсан. Сургуулиудын дадлагын газар нь стандартад нийцээгүй, хөдөлмөрийн аюулгүй байдал, эрүүл ахуйн шаардлагыг бүрэн хангаагүй, сургалтын техник хэрэгсэл, тоног төхөөрөмж, багаж хэрэгслээр бүрэн тоноглогдоогүй, дадлагын газарт багшийн өрөөгүй байна.

Сургалтын ажил эрхлэх тусгай зөвшөөрөлд заагдсан мэргэжил хөтөлбөрөөр мэргэжлийн үндсэн онолын болон дадлагын багшаар бүрэн хангагдаагүй, боловсролын байгууллагад тавигдах шаардлагад нийцэхгүй нэр бүхий 16 багш хичээлийг зааж байсан.

“Барилгын бүтээцийн үйлдвэрлэл”, “Анима”, “Топ”, “Хангай”, Сэргээн засалт хөгжлийн үндэсний төвийн дэргэдэх МСҮТ-үүд нь ерөнхий эрдмийн хичээлийн багшаар бүрэн хангагдаагүй байна.

Дээрхээс гадна эрүүл ахуйн чиглэлээр дээд боловсролын сургалтын 5 байгууллагын  хамруулж хяналт шалгалтын үйл ажиллагаа явуулжээ. Эрсдлийн үнэлгээгээр 1 нь “бага”, 3 нь “дунд”, 1 нь “их” эрсдэлтэй үнэлэгдлээ. “Улаанбаатар эрдэм” их сургуулийн хоол үйлдвэрлэлийн үйл ажиллагааг үнэлэхэд “дунд” эрсдэлтэй үнэлэгдсэн.

Шалгалтаар

• “Шинэ иргэншил” дээд сургуулийн зарим анги, танхимуудын байгалийн болон зохиомол гэрэлтүүлэг, лекцийн танхимд механик агааржуулалтгүй, зарим анги танхим, кабинетуудын нэг оюутанд ноогдох талбайн хэмжээ хүрэлцээгүй, багш, суралцагчдын эрүүл ахуй, аюулгүй байдлын шаардлагыг бүрэн хангуулаагүй,
• “Pадио телевизийн дээд сургууль”-ийн ариун цэврийн өрөөнүүдийн ариутгал халдваргүйжүүлэлт хангалтгүй, цэвэрлэгээний материал, ариутгал халдваргүйжүүлэлтийн бодис нь шинжилгээний бичиггүй;
• Эм зүйн шинжлэх ухааны их сургууль, “Мон Алтиус” дээд сургуулиуд нь ундны усны стандарт аюулгүйн шаардлага хангасан талаар дүгнэлтгүй;
• Эм зүйн шинжлэх ухааны их сургууль, “Мон Алтиус”, Pадио телевизийн дээд сургуулиуд нь “Сургалт-хүмүүжлийн байгууллагад мөрдөх эрүүл ахуй, халдвар хамгааллын үлгэрчилсэн дүрэм”-д нийцүүлэн дотоод хяналтын журмыг боловсруулан баталж мөрдөөгүй, хяналт шалгалтаар илэрсэн зөрчил дутагдлыг арилгахад чиглэсэн арга хэмжээг авч хэрэгжүүлдэггүй;
• Pадио телевизийн дээд сургууль нь ариун цэврийн шаардлага хангахгүй хог хадгалах цэгтэй;
• “Мон Алтиус”, “Шинэ иргэншил”, Pадио телевизийн дээд сургуулиудын лекц, хичээлийн танхим, номын сан, ариун цэврийн өрөөнүүдэд агаар сорох системгүй, шаардлагатай тоног төхөөрөмж бүхий эмчийн өрөөгүй, мэргэжлийн үйл ажиллагаа эрхлэх зөвшөөрөл бүхий эмчгүй, эмнэлгийн анхны тусламж, үйлчилгээнд шаардагдах эм тариа, боолтын материалгүй, оюутнуудын эрүүл мэндийг хамгаалах, халдварт болон халдварт бус өвчлөлөөс урьдчилан сэргийлэх ажил хангалтгүй;
• “Шинэ иргэншил” дээд сургуулийн  дотоод болон гаднах орчинд утаат тамхи татахгүй байх анхааруулга, санамж байршуулаагүй  зэрэг зөрчлүүд илэрлээ.

Г.Эрдэнэ