АТГ-аас МУИС, МУБИС, АШУҮИС-д хийлгэсэн авлига, ашиг сонирхлын зөрчил үүсгэж буй, үүсгэж болзошгүй эрсдэл, хүчин зүйлийг тодорхойлох үнэлгээ хийсэн байна. Уг үнэлгээний тайланг өнөөдөр танилцууллаа.

Энэ талаар Орон нутгийн хөгжлийн бодлого судлалын төвийн тэргүүн, судлаач Л.Буддорж “Гурван сургууль нь дундаж эрсдэлтэй, эрсдэл багатай гэсэн үнэлгээг авсан. Эрсдлийн дүнгээр нь харвал МУИС-2.92, МУБИС-2.57, АШУҮИС-3.02 үнэлгээтэй буюу дундаж эрсдэлт үнэлгээтэй гарсан. Нийтлэг илэрсэн зөрчлийн тухайд төсөв санхүү, шилэн данстай холбоотой зүйлс байсан. Судалгааг энэ оны хоёрдугаар сарын 1-нээс энэ сарыг хүртэл хийсэн бөгөөд тоон судалгааны, чанарын, баримт шинжилгээний аргыг ашигласан. Мөнгө орж гардаг газарт төсөв санхүүтэй холбоотой асуудлууд гардаг. Сургуулиудын хувьд мөнгө эргэлддэг баримт бичгийн бүрдэл дутуу ба и-баримтгүй, тайландаа бүрэн бүртгээгүй тохиолдол их байна. Дундаж эрсдэлтэй бүлэгт орлоо гээд энэ нь авлигын асуудалд орчихсон гэсэн үг биш. Харин авлигад өртөх магадлал байна гэдгийг л хэлж буй хэрэг. Хөндлөнгийн байгууллагын нүдээр харахад багш нар жоохон ёс зүйгүй байна уу даа гэж харсан. Өмнөх арван жилээ бодвол гайгүй болсон ч ёс зүйн зөрчил дутагдал их байна.

Оюутнууд “Багш нар нь ном шахдаг. Ном авбал оноо нэмнэ гэдэг. Хүйсийн ялгаварлал гаргадаг. Эмэгтэй багш нар нь эрэгтэй оюутанд, эрэгтэй багш нар эмэгтэй оюутанд илүү ханддаг. Мөн анх төрүүлсэн сэтгэгдлээр оюутнуудыг төгстөл нь үнэлдэг” зэрэг зөрчлүүдийг хэлсэн. Судалгааны үр дүнгийн хүрээнд авлигаас ангид байя гэвэл байгууллагын удирдлага өөрөө чин хүсэл эрмэлзэлтэйгээр бусад ажилчдаа манлайлж, удирдан чиглүүлж оролцох шаардлагатай. Тиймд байгууллагын удирдлагууд нь манлайлж ажиллах, байгууллагынхаа онцлогт тулгуурласан бодлого боловсруулж ажиллах зэрэг зөвлөмжүүдийг өгсөн. Их сургуулиуд авлигын эсрэг бодлогогүй байна. Огт авлигын эсрэг ажил хийгддэггүй гэж хэлж болохгүй. Гэхдээ цаасан дээр байлгаад бодит ажил болгож чадахгүй байна” гэлээ.

Б.Лхам