Ойрмогхон нэг хүн ЖДҮ-ийн асуудлаар мэдээлэл хийдэг боллоо. Нэр нь Г.Майцэцэг. Албан тушаал нь “Exclusive” компанийн захирал. “Хүннү молл”, “Номин” их дэлгүүрт 120 сая төгрөгийн барааг үнэ төлбөргүй тараах зар тарааж байсан нэгэн. Иргэд ч “дайнд мордсон”, Г.Майцэцэг ч “зугтсан”. Зугтсан гэдэг нь учиртай. Учир нь, түүний зохион байгуулсан “үнэгүй” гэх арга хэмжээ эцэстээ хэрүүлээр өндөрлөсөн байдаг.

Гэтэл өнөөдөр бас нэгэн хүн дуугардаг боллоо, ЖДҮ-ийн асуудлаар. Өнөөх л Г.Майцэцэг. Жижиг дунд үйлдвэрлэлийн сангийн төслийн хүрээнд өнгөрсөн тавдугаар сарын 27-ноос энэ сарын 10-ны хооронд ЖДҮ-ийг дэмжих тухай төслүүдийг хүлээн авсан. Хүлээн авсан төслүүдийг иргэн, аж ахуйн нэгж гэж хоёр хувааж ангилж, нийт 487 тэрбум төгрөгийн төслийг хөдөө орон нутаг, Улаанбаатар хотын иргэд хүссэн тухай албаныхан мэдээлсэн юм. Сонирхолтой нь, Г.Майцэцэг энэ асуудлаар ахин дахин мэдээлэл хийв. Тэрбээр “ЖДҮ бол жижигхэн асуудал биш юм аа. Яагаад гэвэл нэг иргэн гурваас таван хүний, нэг аж ахуйн нэгж хамгийн багадаа 20, 30 хүний ажлын байрыг бий болгох юм. Монгол Улсын зах зээлд өөрсдийн гэсэн байр суурьтай, барьцаалах хөрөнгөтэй, оюуны бүтээлтэй цаашид хөгжих хүсэлтэй аж ахуй нэгжүүд байна. Тэднийг дэмжих хэрэгтэй. 2020 оныг хүлээнэ гэдэг хэтэрхий хүлцэнгүй хэрэг. Хоноцын сэтгэлтэй нөхдийг хорин он битгий хэл хоёрхон өдөр ч төрд байлгахыг хүсэхгүй байна. Бид сэрэх цаг болсон. Албан тушаалд шунаагүй бүх тэмцэгчдийг нэгдээчээ гэж уриалж байна" гэв.

Түүний үг ЖДҮ эрхлэгчдэд сайхан сонсогдсон л байх. Зарим нь алга ташсан байж мэдэх. Гэхдээ нэг асуулт өөрийн эрхгүй төрж байна. “Exclusive” компанийн захирал Г.Майцэцэг Та Чингис бондоос авсан зээлээ төлсөн үү. Шинэчлэлийн Засгийн газрын үед олон улсын зах зээлээс босгосон Чингис бондын зарцуулалтын хүрээнд 888 төслийг дэмжиж, тодорхой хэмжээнд зээл олгосон байдаг. Тэр хүрээнд Бондын мөнгөнөөс зээл хүртсэн нь “Exclusive” компанийн захирал Г.Майцэцэг. Харин өнөөдөр тэр юуны учир ЖДҮ хэмээн хашгирах болов?. Улсаа барьцаалж босгосон Бондын мөнгөний зарцуулалт, эргэн төлөлт өдгөө хүн бүрийн анхаарлын төвд орсон. Энэ тухай Л.Оюун-Эрдэнэ сайд ч тодорхой хэлсэн, холбогдох хүмүүст үүрэг өгсөн, заримд нь хариуцлага тооцохоо илэрхийлсэн. Яг энэ цаг үед “Exclusive” компанийн захирал барин тавин мэдээлэл хийж эхэлсэн нь сонин.

Чин үнэндээ ЖДҮ-ээс хумсалсан асуудал Бондоос зээл авчихаад эргэн төлөлгүй улс төр хийж яваа эрхмүүдтэй адилхан биш гэж үү. Тиймээс “Exclusive” компанийн захирал эрхэм Г.Майцэцэг таниас асууя. Бондоос авсан зээлээ бүрэн гүйцэт төлсөн үү гэж...?

“Өөрийн толгой дээрх бухлыг харахгүй байж өрөөлийн толгой дээрх өвсийг харна” гэж үг бий. Үүн шиг өөрийнхөө авсан зээлийг бүрэн төлөөгүй байж бусдыг шүүх нь зүйд хэр нийцэх вэ? Яг үнэндээ Бондоос ч, ЖДҮ-ээс ч мөнгө авсан, тэрийгээ эргэн төлөөгүй бол адилхан гэмт хэрэг. Авсан зээлээ буцаан төлөх нь Ардын намын даргад нэрээ дэвшүүлэхээс тэс өөр асуудал гэдгийг Г.Майцэцэг захирал эрх биш мэдэж л байлтай.

С.Сүлд