Махны үйлдвэрүүдэд хийсэн хяналт, шалгалтын талаар НМХГ-аас өнөөдөр мэдээлэл хийсэн билээ. Уг шалгалтын талаар тус газрын Хүнсний чанар, стандартын хяналтын Улсын байцаагч Л.Баясгалан болон Сонгинохайрхан дүүрэг дэх Мэргэжлийн хяналтын газрын Хүнсний стандартын Улсын ахлах байцаагч А.Бат-Эрдэнэ нараас тодрууллаа.

А.Бат-Эрдэнэ: Тослогийн хэмжээг 3 дахин багаар бичсэн байсан

-Махны үйлдвэрүүдэд хийсэн хяналт, шалгалтаар ямар ямар зөрчил илрэв. Энэ талаар мэдээлэл өгнө үү?

-Сонгинохайрхан дүүргийн нутаг дэвсгэрт махны чиглэлээр үйл ажиллагаа явуулдаг 16 үйлдвэрт хяналт, шалгалтын ажиллагааг хийлээ. Тухайлбал, мах дулааны аргаар боловсруулдаг буюу экспортод гаргадаг үйлдвэр, мөн бууз, хиам, махан бүтээгдэхүүний үйлдвэр хамрагдсан. Шалгалтаар зарим үйлдвэр өөх тосны хэмжээг илүү гаргасан технологийн алдаа гаргасан нийтлэг зөрчил илэрсэн. Өөрөөр хэлбэл, лабораторийн шинжилгээгээр тослогийн хэмжээ 60-70 хувьтай гарч байхад хаяг, шошгондоо 20-30 хувь гэж бичсэн байсан. Тус үйлдвэрүүдэд Зөрчлийн тухай хуулиар арга хэмжээ авч, зөрчлийг арилгуулах талаар үүрэг чиглэл өгсөн. Мөн үйлдвэрийн ариун цэвэр, гадаад орчин зэрэг нийт зөрчлийн дийлэнхийг эзэлж байна

-Хэдий хэмжээний торгууль оногдуулсан бэ?

-Зөрчлийн тухай хуулиар дээд тал нь гурван сая төгрөгөөр торгодог заалт бий. Хуульд заасан хэмжээгээр торгууль оногдуулсан.

-Дээрх зөрчлүүд байнга гардаг уу?

-Технологийн хувьд гарсан энэ жил цөөнгүй зөрчил гарсан. Өмнө нь гарч байгаагүй. Харин үйлдвэрийн ариун цэвэр, эрүүл ахуйн орчны асуудал нь үйл ажиллагааны явцад гарч байдаг учраас байнга зөрчигдөж байдаг юм.

-Шалгалтын явцад үйл ажиллагааг нь хаасан үйлдвэр бий юу?

-Дүүргийн хэмжээнд тийм асуудал гараагүй. Мөн хяналт, шалгалтад хамрагдаагүй үйлдвэрүүдийг ирэх сард багтаан шалгах төлөвлөгөөтэй ажиллаж байна.

Л.Баясгалан: “Шижир Зол”, “Ванкалби” зэрэг компанийн үйл ажиллагааг түр зогсоосон

-Мэргэжлийн хяналтын газраас явуулсан төлөвлөгөөт шалгалтаар нийслэлийн хэмжээнд дийлэнхдээ ямар зөрчлүүд илэрсэн бэ?

-Мах, махан бүтээгдэхүүний үйлдвэрүүдэд хийсэн шалгалтаар хөдөлмөрийн аюулгүй ажиллагаа болон хөдөлмөрийн харилцааны нийтлэг зөрчил илэрлээ. Мөн хүнсний чанар стандарт, мал эмнэлгийн хяналтын холбогдох хууль дүрмийг зөрчсөн зөрчлүүд нийтлэг гарч байна.

-Мах, махан бүтээгдэхүүний үйлдвэрийн 93 хувь нь өөрсдийн лабораторигүй гэж байна. Лабораторигүй үйлдвэрүүд шинжилгээгээ хэрхэн явуулдаг юм бол?

-Үйлдвэрт тавигддаг гол шаардлага нь тухайн аж ахуйн нэгж түүхий эд, бэлэн бүтээгдэхүүн болон дамжлага дундын хяналтыг лабораторитой, физик хими, микробиологийн хийсэн шинжилгээний дүнд үйлдвэрлэл явуулах ёстой. Лабораторигүй үйлдвэрүүд итгэмжлэгдсэн лабораториудад бүтээгдэхүүн, түүхий эдээ шинжлүүлдэг. Ингэхдээ физик хими, микробиологи, хорт судлал, хүнд метал зэрэг шинжилгээ өгдөг.

-Шалгалтаар уламжлалт болон мал төхөөрдөг хэчнээн газар хамрагдсан бэ?

-Багануур, Налайх дүүрэгт үйл ажиллагаа явуулдаг зургаан аж ахуйн нэгж хамрагдсан. Үүнээс нэг нь эрсдэлтэй үнэлэгдсэн. Харин сүүлийн шалгалтаар дунд эрсдэлтэй үнэлэгдсэн. Мөн мал нядалгааны үед болон технологийн үйл ажиллагааны явцад хэд хэдэн зөрчил илэрсэн.

-Дунд эрсдэлд үнэлэгдсэн зөрчилд ямар арга хэмжээ авсан бэ?

-Их эрсдэлтэй бүлэгт үнэлэгдсэн аж ахуйн нэгжийн үйл ажиллагааг хаадаг. Дунд эрсдэлийг эрсдэлээ бууруулах, хууль стандартыг мөрдөж ажиллах албан шаардлага өгч зөрчлийг арилгуулдаг. Мөн Налайх дүүрэгт үйл ажиллагаа явуулж байсан “Шижир Зол” аж ахуйн нэгжийн үйл ажиллагааг түр зогсоосон.

-Ямар зөрчлийн улмаас хаасан юм бэ?

-Хөдөлмөрийн аюулгүй байдлыг хангаж ажлаагүй, мөн ус нь бохирдолтой гарсан зэрэг эрүүл ахуйн шаардлага хангаагүй. Мөн Баянгол дүүрэгт мах ангилан салгах үйл ажиллагаа явуулдаг “Ванкалби” аж ахуйн нэгжийн үйл ажиллагаа түр хаасан.

Б.Лхам