Монголд амьдарч, ажиллаж байсан Туркийн найман багшийг эх нутаг руу нь албадан буцаах нөхцөл байдал үүсээд буй. Тэдний виз өнгөрсөн зургадугаар сарын 30-наар дууссан байна. Хэрвээ Туркийн талаас эдгээр багш нарын визийг сунгахгүй тохиолдолд эх нутаг руу нь албадан гаргах ёстой.

Тиймээс дээрх багш нар НҮБ-ын Дүрвэгсдийн агентлагт албан ёсоор хүсэлт гаргаж, хамгаалалтанд авахыг хүсжээ. Багш нарын үзэж буйгаар хэрвээ тэднийг эх орон руу нь албадан буцаавал Турк улс дэлхий даяар тархсан багш, сурган хүмүүжүүлэгчдийг “Гуллений хамсаатан” гэж зарлаж, төрийн эргэлт хийх, террорист сүлжээний хамсаатан гэх мэтээр буруутгагдах эрсдэлтэй гэж аж. Энэ ч үүднээс тэдний эрхийг зөрчиж, шоронд хорьж, ял оноох аюул тулгарна гэж эмээж буй юм.

Эдгээр багшийн нэг болох Исаак Илик “Монгол Улсаас гарч явах тохиолдолд тухайн улсын хуулийн дагуу “гарах виз” хэрэгтэй болдог. Тиймээс бидний оршин суугаа виз хүчингүй болсноор гуравдагч орон руу цагаачлалын виз мэдүүлэхэд саад болж байна” гэсэн байна. Одоогоор НҮБ уг асуудалд нухацтай анхаарал хандуулж байгаагаа илэрхийлжээ.