Марихуаныг эмчилгээний зориулалтаар дэлхийн олон оронд ашигладаг талаар аялагч Амай мэдэгдсэн билээ. Тэрбээр "Үүнийг хэт чанга бодлогоор хорих нь буруу" гэсэн юм. 

Тиймээс яагаад гэдгийг түүнээс асуухад "Би судлаач хүн. 2005 оноос хойш олон зүйлийг үзэж, танилцлаа. Нэгэн үе архины нөлөөнд монголчууд бүх нийтээрээ өртсөн. Хамаг л сор болсон залуус энэ давалгаанд өртсөн. Иргэд үүнийг сайн мэдэх байх. Европийн орноор аялаж, амьдарч байх үедээ Баруун Европоос нэг зүйлийг харсан. Тэнд хар тамхины хэрэглээ маш их. Тэнд дон гэдэг зүйлийг өвчин гэж үздэг. Энэ утгаараа эмчилдэг. Гэтэл манай улсад эмчилгээ хийхийн оронд хүн алж, хулгай хийсэн гэмт хэрэгтнүүдтэй цуг цагдан хорьдог. Өөрөөр хэлбэл, гаднын улсад ямар нэгэн зүйлд донтсон бол эмчилж, тусалснаар нийгэмшүүлнэ гэж үздэг. Дон гэдэг зүйл юу юм бэ. Маш олон төрлийн дон бий. Тэр бүгдийг хорьж болохгүй биз дээ.

Үүний дараа олон орноор очиж үзэхэд “Нээрээ барьж хорих бус эмчлэх ёстой юм байна” гэдгийг ойлгосон. Бид маш том төөрөгддөг юм байна. Хар тамхи, мансууруулах бодис гэдгээ ялгадаггүй. Судалж үзвэл, марихауныг монголчууд эртнээс хэрэглэдэг байж. 1990 он хүртэл хэрэглэсэн. Энэ ургамал дэлхийн бүх улсад бүх цаг үед байсан. Хэрэглэдэг байсан. Үүнийг хүлээн зөвшөөрөх хэрэгтэй.

Монголд 17 мянган хүн хар тамхи хэрэглэгч бий гэсэн судалгаа байдаг. Тэгвэл үүнийг зөвшөөрөх ёстой юм байна. Яагаад гэвэл, марихуан нь 200 орчим төрлийн өвчнийг эдгээдэг. Тэр дундаа хорт хавдарын вирүсийг устгадаг. Америкт хорт хавдартай иргэдэд “өвс”-ийг эмчийн заавраар хэрэглүүлдэг. Хааж, боох тусмаа хууль бус хэрэглээ гаардаг. Хамгийн аюултай донтуулагч нь согтууруулах ундаа, дараа нь герион, үүний дараа кокейн ордог. Дараагаар нь утаат тамхи ордог. Утаат тамхинд орсон хүн маш хурдан хугацаанд донтдог. Бага бага хэмжээгээр ойр ойрхон мансуурдаг. Хорт хавдраар өвчлүүлдэг. Тиймээс хуулиар энэ асуудлыг цэгцлэх ёстой. Тэгж байж хууль хяналтын байгууллагын хийсэн ажил үр дүнд хүрнэ. Тэгж байж хууль бус хэрэглээ, хууль бус наймааг зогсоох боломжтой болно" гэлээ.

Г.Эрдэнэ