Улсын нэгдүгээр төв эмнэлэгт хагалгаанд орсон өвчтөний шархнаас цус гарах үед шарх цэвэрлэх ариун бээлий байхгүй байна гэсэн пост твитерт цацагдсан юм.

Энэ талаар тус эмнэлгийн хэвлэлийн албанаас тодруулахад “Болсон процессийг ташаа байдлаар мэдээлсэн байна лээ. Энэ сарын 2-ны өдөр нэг өвчтөн хагалгаанд орсон. Өнөөдөр өглөө шархнаас нь цус шүүрсэн. Тухайн үед өвчтөний сахиур сувилагчаас шарх цэвэрлэхийг хүссэн.

Тэгэхэд нь “Яг одоо ариун бээлий алга. Аваад ирье” гэж хэлсэн гэсэн.

Гэтэл цус харсан, нөгөөтэйгүүр аавынх нь бие тааруу байгаад сэтгэл нь зовж, сандарсан хүүхэд нь үүнд их эмзэг хандсан байна лээ. Өвчтөний хувьд биеийн байдал маш муу ирсэн. Хагалгаа хийсэн. Эмч нар маань өглөө 6.30 цагт ирж, өвчтөнийг үзсэн. Бид огт тэр хүнийг бусдаас ялгаж, муухай харьцаагүй. Гэтэл ийм зүйл болсон.

Ийм мэдээлэл цацагдсаны дараа тэр хүнтэй уулзсан. Тэгэхэд “Би их сандарсан. Тэр эмоциндоо биччихсэн” гэж хэлсэн.

Манай эмнэлэгт эм тариа болон бусад хангамжийг хариуцсан алба байдаг. Энэ албаны хүмүүс 24 цагаар ээлжинд ажилладаг. Хаана, ямар эм, бэлдмэл, хангамж дутагдалтай байгааг цаг тухайд нь шалгадаг. Ариун бээлий хангалттай бий. Тасарсан зүйл огт байхгүй. Удахгүй албан ёсны мэдэгдэл гаргана” гэлээ.

Г.Эрдэнэ