Нийслэлийн 92 дугаар сургуулийн сурагч Б.Ариунбилэг охин "Би том болохоос айж байна" хэмээн хэлсэн нь цахим орчинд цацагдаж, олны анхаарлыг татсан юм. Учир нь тэрбээр сургуулийн шат өөд өдөр бүр ээжээрээ тэврүүлж ангидаа ордог байжээ. Тиймдээ ч  ээжийгээ өрөвдөж өдөр бүр ингэж ядраахаас айж, шантарсан учир ийн хэлсэн юм.

Тэгвэл сургуульдаа явах дуртай ч тэргэнцэртэй явах орчинг үгүйлж байсан түүний хүсэл, мөрөөдлийг хилийн чанадад хүрч БНСУ-ын Тээврийн сургуулийн оюутнууд биелүүлжээ. Тодруулбал, БНСУ-ын Тээврийн сургуулийн оюутнууд 92 дугаар сургуульд тэргэнцэртэй сурагчдад зориулсан зам байгуулж өгсөн байна.

Оюутнууд тус сургуульд сайн дурын ажил зохион байгуулахаар гурван сарын турш бэлтгэл хийж урлагийн заал, спорт заалыг тохижуулж, тэргэнцэртэй явах зориулалтын замтай болгож өгсөн байна. Нээлтийн арга хэмжээний үеэр Б.Ариунбилэг охин "Би одоо сургуульдаа явахаас айхгүй боллоо. Ээж минь ч дахин ядрахгүй байх. Миний нэгэн адил найзууд маань хичээлдээ улам дуртай ирдэг болох нь дамжиггүй. Тиймээс оюутан ах, эгч нартаа баярлалаа. Би том болоод дуртай мэргэжлээ эзэмших болно. Ажил хийж энэ ах, эгч нар шигээ бусдад тусалдаг сайн хүн болох болно оо" гэсэн байна.

Г.Алимаа