Жюү жицүгийн насанд хүрэгчдийн Ази тивийн аварга шалгаруулах тэмцээн манай улсад анх удаа болж байна. Тус тэмцээнд оролцохоор ирсэн жюү жицүгийн Казахстаны шигшээ багийн тамирчин Молдир Мекенбаева олны анхаарлыг татаад байна. 2016 оны дэлхийн аварга, 2017 оны дэлхийн аваргын мөнгөн медальт тэрбээр тамирчдаас хамгийн өндөр чансаатай нь. Ингээд түүнийг бэлтгэлээ хийгээд завгүй байх үед нь хэсэгхэн хором ярилцсанаа хүргэе.
-Монголд тавтай морил. Онгоцноос буугаад удалгүй бэлтгэлдээ орсон гэж сонслоо. Ядрахгүй байна уу?
-Маш их баярлалаа. Нэлээд ядарч байна. Өдөр нэлээд унтсан хэрнээ ядаргаа арилаагүй байна. Мэдээж Монгол Улс маш их таалагдсан. Ирээд удаагүй учраас Улаанбаатар хоттой хараахан танилцаж амжаагүй явна. Гэхдээ бэлтгэлээ тараад Монголын сайхан агаарыг амьсгалангаа хоттой танилцах санаа бий.
-Тамирчид Монголд 3-4 хоногийг өнгөрүүлнэ. Энэ хооронд хамгийн их очихыг хүсэж төлөвлөсөн газар бий юу?
-Зугаалах цаг гарах болов уу даа. Маргааш тэмцээнтэй. Барилдсаар байгаад өдөр өнгөрнө. Цаг гарвал очихыг хүссэн газар бүртээ очно.
-Та 2018 оны Азийн наадамд Монголын бөх М.Баярмаад ялагдсан удаатай. Одоо төрөлх дэвжээн дээр нь барилдана. Юу бодож байна вэ?
-Тодорхой хэмжээний тактик боловсруулсан. Дасгалжуулагчтайгаа бэлдсэн зүйл бий. М.Баярмаад ялагдсан тухайд их гэнэтийн зүйл болсон. Монголчууд хоёр гартаа үнэхээр их бяртай юм билээ. Тэдний нэг нь Баярмаа. Монголын тамирчид самбо, жүдодоо үнэхээр сайн шүү дээ. Тиймээс жюү жицүгээр ч сайн байх нь аргагүй. Уг нь би Азийн наадамд өөр зорилготой очиж байлаа. Даанч зорилгодоо хүрч чадаагүй. Гэхдээ энэ өнгөрсөн асуудал.
-Жюү жицүг сонгоход хүргэн ах тань нөлөөлсөн гэж сонслоо. Өөр спортын сонголт байгаагүй юм уу?
-Тийм ээ. Би хоёр эгчтэй. Хүргэн ах маань жюү жицүгийн хар бүстэй. Эгчээр минь дамжуулж намайг жюү жицүд уруу татсан хэрэг. Гэр бүлийнхний дэмжлэг сайн байсан болоод тэр үү, маш хурдан хугацаанд дурласан.
-Жюү жицүгээр өмнө өөр спортоор хичээллэж байсан уу?
-Үгүй. Зөвхөн жюү жицү. Яах вэ, чөлөөтөөр цагаараа шатар, экстрим спортыг сонирхож хичээллэдэг. Гэхдээ энэ бол зөвхөн сонирхол. Харин жюү жицү бол миний үүрдийн спорт. Өөр спорт сонгохгүй.
-Энэ спортод та нэлээд гүнзгий автжээ. Магадгүй таны үзүүлж байгаа амжилт нөлөөлж байна уу?
-Тийм байж болох л юм. 2016 онд жюү жицүгээр дэлхийн аваргад түрүүлсэндээ маш их баярладаг. Надаас илүү миний хүргэн ах, гэр бүлийнхэн баярласан. Ямар ч байсан энэ спортдоо би маш их дуртай. Амьдралын минь нэг хэсэг шүү дээ.
-Их сургуульд сурахын хажуугаар бэлтгэл хийж кинонд тоглох гээд завгүй байдаг байх. Энэ бүгдийг хэрхэн амжуулж байна вэ?
-Би дээд сургуульд математикийн чиглэлээр суралцдаг. Гэхдээ өөрийн сонирхлоор кинонд дүр бүтээдэг. Би хэд хэдэн кинонд тоглосон. Казахстанчуудын өв соёлыг сурталчилсан бүтээл учраас татгалзаж болохгүй гэж бодож тоглосон.
Б.Жаргал