Төв аймгийн Улаанцайдам суманд болсон хэргийн мөрөөр ЦЕГ-ын Хэвлэл мэдээллийн төвийн дарга, дэд хурандаа Б.Баатархүү мэдээлэл хийлээ. Тэрбээр “Юун түрүүнд талийгаачийн ар гэрт эмгэнэл илэрхийлье. Төв аймгийн Улаанцайдам сумын эмнэлэгт энэ сарын 23-ний өдрийн 19.40 цагт 61 настай иргэн нас барсан гэсэн дуудлага ирсэн.
Дуудлагын дагуу Мөрдөн байцаах албаны Тусгай субьектийн үйлдсэн гэмт хэргийг мөрдөн шалгах хэлстийн ахлах мөрдөгчөөр ахлуулсан бүрэлдэхүүн хэргийн газарт үзлэг хийсэн. Бүрэлдэхүүнд прокурор, шинжээч эмчийн баг орсон. Болсон хэргийг мөрдөн шалгаж байна. Задлан шинжилгээ хийнэ. Дүгнэлт гараагүй байгаа учраас үхлийн шалтгааныг тодорхой хэлэх боломж хомс байна. Хэргийг талаар нэр бүхий хоёр мэдээллийн сувгаар дамжуулсан. Гэхдээ цагдаагийн байгууллагаас мэдээлэл аваагүй учраас мэдээллийг хомс байдлаар хүргэсэн. Бид хэн нэгнийг хамгаалаагүй. Бодит байдал дээр юу болсныг танилцуулъя.
Төв аймгийн Заамар сумын ахлах мөрдөгч, цагдаагийн хамтаар ажил үүргээ гүйцэтгэж явж байсан. Хулгайн гэмт хэрэгт сэрдэгдсэн 14 настай хүүгээс тайлбар мэдээ аваад явах үед тус сумын нутаг дэвсгэрт үйл ажиллагаа явуулдаг дэлгүүрийн гадаа гар, хөл нь цус болсон хүн орилж байгаатай таарсан байна. Үүний дагуу дээрх хоёр алба хаагч очиж, шалгасан. Шалгалт хийх үеэр талийгаач нь согтууруулах ундаа хэрэглэсэн үедээ тээврийн хэрэгсэл жолоодож байсан байна. Гар, хөл нь цус болсон асуудлын хувьд үхэр гаргачихаад ажилчдынхаа хоолыг хийхээр явах гэж байсан юм байна. Ингээд тэдний хооронд маргаан үүссэн. Цагдаагийн алба хаагчид тухайн иргэнийг сумын цагдаагийн газарт аваачиж, согтуурлын хэмжээг шалгахаар авч явсан. Замдаа эсэргүүцэл үзүүлсэн. Энэ үед хохирогчийн биеийн байдал муудахаар нь эмнэлэгт хүргэж өгсөн. Ийм тайлбар мэдүүлэг өгсөн. Бид хэргийг тал бүрээс нь шалгах болно. Хэргийн бодит үнэнийг тогтоох нь цагдаагийн байгууллагын үүрэг.
Цагдаагийн хоёр алба хаагчид тухайн иргэнийг хаяж зугтаасан гэсэн мэдээлэл цацагдсан. Уг асуудлыг тодруулахад тухайн хоёр цагдаагийн алба хаагч хохирогчийг эмнэлэгт хүргэж өгөх үед дөрвөн залуу ирсэн. Ингээд тэдний биед халсан. Ахлах офицерийн толгой хавдсан. Автомашин барьж явсан цагдаагийн тархи хагарсан гэсэн мэдээлэлтэй байна. Үүнийг шалгана. Хохирогчийн гадна үзлэг хийгдсэн. Задлан шинжилгээний хариу эцэслэн гарсны дараа тодорхой мэдээлэл өгнө. Мөрдөн шалгах ажиллагааг эхлүүлсэн” гэлээ.
Г.Алимаа
Сэтгэгдэл (14)