Ерөнхийлөгчийн Тамгын газрын дарга З.Энхболд Сүхбаатар дүүргийн цагдаагийн хэлтэст хотын дарга асан Э.Бат-Үүл гүтгэлэгийн шинжтэй нийтлэл бичиж олон нийтэд тараасан хэмээн гомдол гаргасан байдаг. Энэ дагуу цагдаагийн байгууллагаас иргэн Э.Бат-Үүлийг бусдыг гүтгэсэн гэж үзэн Зөрчлийн хуулийн 6.21-д заасны дагуу хоёр удаа хоёр сая төгрөгөөр торгосон юм. Гэвч хотын дарга асан Э.Бат-Үүл уг шийдвэрийг үндэслэлгүй торгосон гэж үзэж харьяаллын дагуу хуулийн дагуу Сүхбаатар дүүргийн эрүүгийн хэргийн анхан шатны шүүхэд хандсан. Түүний өргөдлийг өнөөдөр Сүхбаатар дүүргийн эрүүгийн хэргийн анхан шатны шүүхэд хэлэлцсэн ч хойшиллоо.

Учир нь, шүүх хуралд прокурор болон эрх бүхий албан тушаалтан нар нь хүндэтгэн үзэх шалтгааны улмаас ирээгүй тул ирэх 01-ний 14:00 цаг хүртэл хойшлуулсан байна.

Энэ талаар нэхэмжлэл гаргагч Э.Бат-Үүл "Хууль зөрчиж торгосон гэдгийг зориуд хэлэхийг хүсч байна. Өмгөөлөгчтэйгөө мэдүүлэг өгнө өө гэж хэлсээр байтал шууд торгочихсон. Надаас ямар ч байцаалт мэдүүлэг аваагүй. Энэ нь нэг талын захиалгаар хийгдсэн. Би М.Энхсайханыг баривчлах үйл явцыг буруушааж жиргэхэд З.Энхболд намайг нэр төрд халдсан гэж шүүхэд гомдол гаргасан.

Асуудлын гол нь хуулийн байгууллагууд нэг хүний хүсэлтээр ажиллаж, шууд торгууль тавьж болохгүй. Мөн Тамгын газрын дэд дарга Г.Байгалмаа намайг Ерөнхийлөгчийн нэр төрд халдсан, бүр төрийн байгууллагуудын нэр хүндэд халдсан гэж гомдол үүсгэсэн. Бас торгууль тавьсан. М.Энхсайхныг баривчлах үед З.Энхболд хууль шүүхийн байгууллагын ямар ямар хүнтэй утсаар ярьсан, холбоо тогтоосон байж болохыг би шалгуулна. Надад мэдээллийн эх сурвалж бий. Би эх сурвалжаа нууцлах эрхтэй. Ер нь сүүлийн үед Тамгын газрын дарга утсаа шүүрч аваад дуртай прокурор, хууль шүүхийн хүмүүс рүү ярьдаг болсон. Үүнийг шалгуулах хүсэлтэй байна" гэсэн юм.

С.Сүлд