АН-ын дарга С.Эрдэнэ Ерөнхий сайд У.Хүрэлсүхэд баримт бичиг төрийн нууцаас гаргах тухай албан бичиг хүргүүлжээ. Албан бичигт “УИХ-ын гишүүн, Засгийн газрын гишүүн, Дэд бүтцийн сайд асан с.Зориг агсны амь насыг хөнөөсөн Б.Содномдаржаа, Ц.Амгаланбаатар, Т.Чимгээ нарт холбогдох эрүүгийн 830142 хэргийг “маш нууц” зэрэглэлээр шүүх анхан, давж заалдах болон хяналтын журмаар хянан шийдвэрлэсэн байх бөгөөд шийтгэх тогтоолыг Тагнуулын ерөнхий газрын тусгай архивт шилжүүлсэн байна.

Таны тэргүүлсэн Засгийн газрын гишүүн, Хууль зүй, дотоод хэргийн сайд Ц.Нямдорж нь Б.Содномдаржаа, Т.Чимгээ нарыг эрүүдэн шүүсэн, хилсээр шийтгэгдсэн гээд тэдний ар гэрээс Засгийн газрын нэрийн өмнөөс уулчлал гуйсан, мөн тэднийг эрүүдэн шүүсэн талаарх дүрс бичлэгийг Засгийн газрын шийдвэрээр нууцын зэрэглэлээс гаргаж УИХ-ын гишүүд, сэтгүүлч нарт, сүүлдээ Монголын үндэсний олон нийтийн телевизээр орон даяар нээлттэй үзүүлсэн.

Уг үйлдэл нь олон нийтийн шүүхийн шийдвэрт итгэх итгэлд ноцтой эргэлзээ төрүүлж байгаа тул Б.Содномдаржаа, Ц.Амгаланбаатар, Т.Чимгээ нарт холбогдох эрүүгийн 830142 дугаартай хэргийн шүүхийн шийдвэрийг “маш нууц” зэрэглэлээс гаргаж, олон нийт танилцах боломжоор хангахын зэрэгцээ уг хэргийн бодит байдал Монголын ард түмэнд нээлттэй болж, тэднийг Монгол Улсын шүүх хилсээр шийтгэсэн эсэх, эрүүдэн шүүж хэрэг хүлээлгэсэн эсэх талаарх баримт тодорхой болж, олон нийтийн эргэлзээ тайлагдах болно гэж үзэж байна” гэжээ.

С.Сүлд