УИХ дахь МАН-ын бүлэг ээлжит бусаар хуралдаж Ерөнхийлөгчийн хоригийг хүлээж авах боломжгүй гэж үзжээ. Энэ талаар Бүлгийн дарга Д.Тогтохсүрэн “Хурлаар хоёр асуудал хэлэлцсэн. Нэгдүгээрт, УИХ-ын 73 дугаар тогтоолд тавьсан Ерөнхийлөгчийн хоригийг хэлэлцсэн. Хоёрдугаарт, Ерөнхийлөгчийн зүгээс Жанжин штабын даргыг шинээр томилохыг зөвшилцөх санал оруулж ирсэн. Нэгдүгээр асуудлын тухайд УИХ зургадугаар сараас хойш гурван сар шахам хэлэлцэж, хоёрдугаар хэлэлцүүлгийг дуусгасан. Үүнд тавьсан Ерөнхийлөгчийн хоригийг хүлээж авах боломжгүй гэж үзсэн. Социологийн судалгаа явуулж үзэхэд Ард нийтийн санал асуулгын хүрээнд Үндсэн хуулийн нэмэлт, өөрчлөлтийг батлах нь зүйтэй гэж үзсэн. Хоёрдугаарт, Жанжин штабын даргаар Д.Ганзоригийг нэр дэвшүүлсэн асуудлыг дэмжсэн” гэлээ.

Үүний дараа тэрбээр сэтгүүлчдийн асуултад хариулсан юм.

-Хоригийг хүлээж авсан тохиолдолд Ард нийтийн санал асуулгыг явуулах боломжгүй болох байсан гэсэн үг үү?

-Хүлээж авсан тохиолдолд Ард нийтийн санал асуулга явуулах боломжгүй. Хоёр л гарц байгаа юм. Гуравдугаар хэлэлцүүлгээр шууд батлах. Эсвэл хэлэлцүүлгийг зогсоох гэсэн. Гуравдугаар хэлэлцүүлгээр батлах боломж бидэнд бий юу байгаа. Гэхдээ ард нийтээр батлуулъя гэсэн байр суурьтай байгаа юм.

-Ерөнхийлөгчийн хоригийг хүлээж аваагүй тохиолдолд улс төрийн ямар нэгэн эрсдэл байгаа юу?

-Хориг хүлээж авахгүй гэсэнтэй холбогдуулж УИХ нэг шийдвэр гаргана. Тэр нь тов тогтоох тухай. Энэ тогтоолоор зардлын асуудлыг шийдвэрлэх ёстой. Бидний зүгээс энэ сарын 30, 31 гэж тооцсон. Гэвч түүнээс хойш сар гаруйн хугацаа өнгөрчихлөө. Бидэнд хоёр боломж байгаа. Нэг нь энэ жилдээ багтаах, нөгөөх нь ирэх оны ээлжит сонгуультай хамтатгаж явуулах.

-Хоригийг хүлээж авахгүй байх үндэслэл нь юу байсан бэ?

-Огт үндэслэл алга гэж үзсэн. Ерөнхийлөгч зарчмын хоёр асуудал тавьсан. Үндсэн хуулийн нэмэлт, өөрчлөлт оруулах асуудлыг тусгайлсан хууль байгаагүй. Мөн Үндсэн хуулийн 25.1.16-г дурдаагүй байна гэсэн. Үүнийг нь хууль зүйн хувьд бүрэн хангагдсан гэж үзсэн. Тиймээс хүлээж авах боломжгүй. АН-ын бүлэгтэй даваа гарагт уулзсан.

С.Сүлд